6 އިން ދަށުގެ ކްލާސްތައް އޮންލައިންކޮށް ކުރިޔަށް ގެންދަން ނިންމައިފި

މާލޭ ސަރަހައްދުގެ ސްކޫލްތަކުގައި، ކުރިޔަށް އޮތް 2 ހަފްތާޔަށް ގްރޭޑް 1 އިން ފެށިގެން 6 އާ ހަމައަށް ކްލާސްތައް އޮންލައިންކޮށް ކުރިޔަށް ގެންދަން ނިންމައިފިއެވެ.

Ads by Sosun Fihaara

އެޑިއުކޭޝަން މިނިސްޓްރީން ބުނެފައިވަނީ، މާލޭގައި ކޮވިޑް-19 ކޭސްތައް އިތުރުވަމުންދާތީ، އެޗްޕީއޭގެ އިރުޝާދުގެމަތިން 14 ފެބްރުއަރީއިން ފެށިގެން 25 ފެބްރުއަރީއާ ހަމައަށް މާލޭ ސަރަހައްދުގެ ސްކޫލުތަކުގެ ގްރޭޑް 1 އިން 6 އެއްގެ ކިޔެވުން އޮންލައިންކޮށް ކުރިޔަށް ގެންދަން ނިންމާފައިވާ ކަމަށެވެ.

ކޮވިޑް-19 އާ ގުޅިގެން ސްކޫލްތަކުގެ ކިޔެވުން ދިގު މުއްދަތަކަށް މެދުކަނޑާލުމަށްފަހު، ސުކޫލުތަކުގެ ކިޔެވުން ފަށާފައިވަނީ ޖެނުއަރީ މަހުގެ 10 ވަނަ ދުވަހުއެވެ.

ސުކޫލުތަކުގައި ކިޔެވުން ފަށާފައިވަނީ ރައްކާތެރިކަމުގެ ގޮތުން އެތައް ފިޔަވަޅުތަކެއް ވެސް އަޅައިގެންނެވެ. އެގޮތުން ސްކޫލްތަކުގެ އިސްވެރިންނާއި މުވައްޒަފުންނާއި ޓީޗަރުންގެ އިތުރުން ދަރިވަރުން ވެސް ސްކޫލަށް ވަދެފައި ވަނީ މާސްކު އަޅައިގެންނެވެ. މީގެ އިތުރުން ކޮންމެ ކުއްޖަކުވެސް ކްލާހަށް ފޮނުވުމުގެ ކުރިން ސަފު ހަދާ، ޓެމްޕަރޭޗަރު ވެސް ބަލާފައިވެއެވެ. ދަރިވަރުންނަށް ކިޔަވައިދޭން ފެށުމުގެ ކުރިން، އެކުދިންގެ އަތް ދޮއްވަން ވެސް ފޮނުވައެވެ. އަދި ކެއްސާ ކިނބިހި އަޅާނަމަ ކަންކުރަންވީ ގޮތްތައް ވެސް ސްލޫލްތަކުން ވަނީ ދަރިވަރުންނަށް ކިޔައިދީފައެވެ.

ސުކޫލުތަކުގެ ކިޔެވުން އޮންލައިންކޮށް ބަދަލުކޮށްފައި މިވަނީ ގިނަ ބަޔަކު އެކަމާ ގުޅިގެން ކަންބޮޑުވުން ފާޅުކުރަމުން އަންނަނިކޮށްކަން ފާހަގަ ކޮށްލެވެއެވެ.