ސަފާރީ ކޭސްއާ ގުޅިގެން ބަލަމުން އަންނަނީ ޖިންސީ ގޯނާގެ މައްސަލައެއް، ރޭޕް ކޭސްއެއް ނޫން: ފުލުހުން
ހުޅުމާލޭ ކައިރީ އަޅާފައި އޮތް ސަފާރީއަކަށް ދިޔަ ބިދޭސީ އަންހެނަކު ރޭޕް ކުރި ކަމަށް ބުނެ ބައެއް މީޑިއާތަކުން ރިޕޯޓުކޮށްފައި އޮތް ނަމަވެސް ބަލަމުން އަންނަނީ ޖިންސީ ގޯނާކުރި މައްސަލައެއް ކަމަށް ފުލުހުން ބުނެފިއެވެ.
ފުލުހުން ބުނީ އެ މައްސަލަ ރިޕޯޓުކޮށްފައިވަނީ މިދިޔަ ބުރާސްފަތި ދުވަހުގެ ރޭ ފަތިހު 5:00 ހާއިރު ކަމަށެވެ.
އެ މައްސަލައިގެ ތުހުމަތުގައި ފުލުހުން ވަނީ އެ ސަފާރީ އިން 39 އަހަރުގެ ދެ ދިވެހިން ހައްޔަރުކޮށްފައެވެ. ފުލުހުން ބުނީ އެ މައްސަލާގައި ތަހުގީގަށް ހައްޔަރުކޮށްފައި ބެހެއްޓޭނެ އެކަށީގެންވާ ސަބަބެއް ނެތުމުން، އެ ދެމީހުން ވެސް މިހާރު ދޫކޮށްލާފައިވާ ކަމަށެވެ.
އެ މައްސަލައިގެ އިތުރު މައުލޫމާތު ހޯދުމަށް ފުލުހުންގެ މީޑިއާ ގްރޫޕުގައި ނޫސްވެރިޔަކު ސުވާލު ކުރުމުން ފުލުހުންގެ ތަރުޖަމާނު ވިދާޅުވީ ބަލަމުން އަންނަނީ ރޭޕް ކޭސްއެއް ނޫން ކަމަށާއި ޖިންސީ ގޯނާގެ މައްސަލައެއް ކަމަށެވެ.
ގާނޫނުގައި ބުނެފައިވާ ގޮތުގައި ޖިންސީ ގޯނާ އަކީ ރޭޕް ކުރުމެއް ނޫނެވެ. އެއީ ދެމަފިރިން ކަމުގައި ނުވާ ދެ މީހެއްގެ ދެމެދުގައި ޖިންސީ ނިޔަތެއް އޮވެގެން ނުވަތަ ޖިންސީ ނިޔަތެއް އޮވެގެން ނޫން ނަމަވެސް މީހެއްގެ ރުހުމާ ނުލާ އޭނާގެ ޖިންސީ ގުނަވަނެއްގައި އަތް ލުމެވެ. ނުވަތަ މީހެއްގެ ޖިންސީ ގުނަވަނެއް އެހެން މީހެއް ރުހުމާ ނުލައި ހާމަކުރުމެވެ. ނުވަތަ މީހެއްގެ ޖިންސީ ގުނަވަނަކަށް އޭނާގެ ރުހުމާ ނުލައި ހާނިކައެއް ކުރުމެވެ. ނުވަތަ އެ ނޫންވެސް އިހާނެތި އަމަލެއް މީހެއްގެ ޖިންސީ ގުނަވަނަކަށް އޭނާގެ ރުހުމާ ނުލާ ކުރުމެވެ.
