އިންތިހާބުގައި ހަރަކާތްތެރިވާ އޮފިޝަލުން ތަމްރީނުކުރާނެ ފަރާތްތައް ހޯދަނީ
ކުރިއަށް އޮތް ލޯކަލް ކައުންސިލް އިންތިހާބުގައި ހަރަކާތްތެރިވާ އޮފިޝަލުން ތަމްރީނު ކޮށްދޭނެ ޓްރެއިނަރުން ހޯދުމަށް އިލެކްޝަންސް ކޮމިޝަނުން އިއުލާނު ކޮށްފިއެވެ.
އީސީން މިއަދު ކުރި އިއުލާނެއްގައި ވަނީ ކުރިއަށް އޮތް ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި ވޯޓުލާ މަރުކަޒުތަކުގައި މަސައްކަތްކުރާ އޮފިޝަލުން ތަމްރީނު ކުރާނެ 33 ޓްރެއިނަރުން ބޭނުންވާ ކަމަށް ބުނެފައެވެ.
އޮފިޝަލުން ތަމްރީނު ކުރުމަށް ހޮވޭ ޓްރެއިނަރުންނަށް އަމާޒުކޮށް 2021 މާރިޗް 06 އިން 2021 މާރިޗް 13 އަށް ޓްރެއިނިން އޮފް ޓްރެއިނާސް (ޓީ.އޯ.ޓީ) ޕްރޮގްރާމެއް މާލޭގައި ކުރިއަށް ގެންދާނެ ކަމަށް ވެސް އެ ކޮމިޝަނުން ބުނެއެވެ.
ޓްރެއިނަރުންގެ ގޮތުގައި ހޮވޭ ފަރާތްތަކަށް ކުރިއަށްގެންދާ ޓީ.އޯ.ޓީގެ ހުރިހާ ހަރަދުތައް ހަމަޖައްސާނީ އިލެކްޝަންސް ކޮމިޝަންގެ ފަރާތުންނެވެ.
މީގެ އިތުރުން ޓީ.އޯ.ޓީ ފުރިހަމަ ކުރައްވާ ފަރާތްތަކާއެކު އިގުރާރު ކުރެވޭނެ ކަމަށާއި ތަމްރީނު ކުރުމުގައި އަތޮޅުތަކާއި، ސިޓީތަކުގައި ހަރަކާތްތެރިވާ ކޮންމެ ދުވަހަކަށް 1000 (އެއްހާސް) ރުފިޔާގެ އުޖޫރައެއް ދެވޭނެ ކަމަށް ވެސް އީސީން ކޮށްފައިވާ އިއުލާނުގައި ބުނެފައިވެއެވެ.
ޓްރެއިނިންގ އޮފް ޓްރެއިނާސް (ޓީ.އޯ.ޓީ) ޕްރޮގްރާމު ފުރިހަމަ ކުރާ ފަރާތްތަކަށް އުޖޫރައެއްގެ ގޮތުގައި 1800 ރުފިޔާ ލިބިގެންދާނެ އެވެ.
މިކަމަށް ޝައުގުވެރިވާ ފަރާތްތަކުން 18 ފެބްރުއަރީ 2021 ވާ ބުރާސްފަތި ދުވަހުގެ 14:00 ގެ ކުރިން އީމެއިލް މެދުވެރިކޮށް އިލެކްޝަންސް ކޮމިޝަނަށް އެޕްލިކޭޝަން ފޯމް ހުށަހަޅަށް ޖެހޭނެއެވެ.
