ލޯބިވެރިޔާ ގާތު އިންނަން އެހީ އެހެން ލޯބިވެރިއެއްގެ އަތުން ވަގަށް ނެގި އަނގޮޓިއެއް ބޭނުން ކޮށްގެން!
އޮރެންޖް ސިޓީ، ފްލޮރިޑާ: ފްލޮރިޑާއަށް ނިސްބަތްވާ ފިރިހެނަކު އޭނާގެ ލޯބިވެރިއެއްގެ އަތުން ވަގަށް ނަގާފައިވާ އަނގޮޓިއެއް ބޭނުން ކޮށްގެން އެހެން ލޯބިވެރިއެއްގެ ގާތުގައި އިންނަން އަހައިިފިއެެވެ.
ފްލޮރިޑާގެ ކަމާ ބެހޭ ފަރާތްތަކާ ހަވާލާދީ ބޭރުގެ ނޫހެއް ކަމަށްވާ "ގަލްފް ނިއުސް"ގައި ބުނެފައިވަނީ އުމުރުން 48 އަހަރުގެ ޖޯސެފް ޑޭވީސް ނަމަކަށް ކިޔާ މީހަކު މީހެއްގެ އަތުން އަނގޮޓިއެއް ވަަގަށް ނަގާފައިވާ ކަމުގެ ރިޕޯޓް މިއަހަރު ކުރީ ކޮޅު ލިބިފައިވާ ކަމަށެވެ. އަދި މިހާތަނަށް ވެސް އޭނާ ހޯދިފައި ނުވާ ކަމަށް ވެސް އެގައުމުގެ ކަމާ ބެހޭ ފަރާތްތަކުން ބުނެއެވެ.
ޖޯސެފް އޭނާގެ ލޯބިވެރިއެއްގެ އަތުން ވަގަށް ނަގާފައިވާ އަނގޮޓިއެއް ބޭނުން ކޮށްގެން އޭނާގެ އެހެން ލޯބިވެރިއެއްގެ ގާތުގައި އިންނަން އަހާފައިވާއިރު، އަނގޮޓީގެ ވެރި ފަރާތަށް މިކަން އެނގުނީ ފޭސްބުކުން ފެނުނު ވީޑީއޯއެއްގެ ސަބަބުންނެވެ. އަދި އޭނާއަށް އެކަން ޔަގީންވީ އޭނާގެ ގަހަނާ އަޅާ ފޮށީގައި އެ އަނގޮޓި ފެންނަން ނެތުމުންނެވެ. އެ އަނގޮޓި އަކީ އޭނާގެ މާމަ އަށް ނިސްބަތްވާ ވަރަށް އަގުބޮޑު އަނގޮޓިއެކެވެ. އެގޮތުން މި އަނގޮޓީގެ ޖުމުލަ އަގަކީ 6،270 އެމެރިކާ ޑޮލަރެެވެ.
މި ވީޑިއޯ ފެނުމާއެކު މި އަންހެންމީހާ ވަނީ ޖޯސެފް ޑޭވީސް އިންނަން އެހި އަންހެން މީހާއާ ބައްދަލު ކޮށްފައެވެ. އަދި މި ދެމީހުން މަޝްވަރާ ކުރުމަށް ފަހު އެ މައްސަލަ ވަނީ ކަމާބެހޭ ފަރާތްތަކަށް ހުށަހަޅައިފައެވެ. އަދި ޖޯސެފް ޑޭވީސް ވަނީ އެކި ލޯބިވެރިންގެ ގާތުގައި އޭނާގެ ނަން އޮޅުވާލާފައެވެ. އެގޮތުން ބައެއް މީހުންގެ ގާތުގައި އޭނާ ބުނީ އޭޭނާ އަކީ "ޖޯ ބްރައުން" ކަމަށެވެ. އަދި އަނެއްބައި މީހުންގެ ގާތުގައި "މާކަސް ބްރައުން" ކަމަށެވެ. އަދި ޖޯސެފް ޑޭވީސް އަކީ ވެސް އޭނާގެ އަސްލު ނަން ނޫން ކަމަށް ރިޕޯޓްތައް ބުނެއެވެ.
ފްލޮރިޑާގެ ކަމާބެހޭ ފަރާތްތަކުން އޭނާ ހޯދުމުގެ މަަސައްކަތް އަދިވެސް ކުރަމުންދާއިރު އަދި ވެސް އެ މަސައްކަތަށް ކުރިއެރުމެއް ހޯދިފައެއް ނުވެއެވެ.
Ads by STO
