ވެކްސިންގެ ދެ ޑޯޒު ފުރިހަމަކޮށް ރާއްޖެއިން ބޭރަށް ފުރަން ބޭނުން ދަރިވަރުންގެ މައުލޫމާތު ހޯދަނީ
ކޮވިޑް19 ވެކްސިންގެ ދެ ޑޯޒު ފުރިހަމަކޮށް ރާއްޖެއިން ބޭރަށް ފުރޭނެ މުއްދަތު އޮތް ދަރިވަރުން އެކަން އަންގަން ހަޔާ އެޑިއުކޭޝަން މިނިސްޓްރީން އެދިއްޖެއެވެ.
ވެކްސިންގެ ދެ ޑޯޒު ފުރިހަމަ ކުރަން ބޭނުންވާ ދަރިވަރުން ރަޖިސްޓްރީވާން ޖެހޭނީ ގޫގުލް ފޯމް މެދުވެރިކޮށެވެ.
މިވަގުތު ރާއްޖޭގައި ތިބި ދަރިވަރުން ކޮވިޑް19 ގެ ވެކްސިން ދެ ޑޯޒް ފުރިހަމަ ކުރުމަށް ފަހު އެނބުރި ރާއްޖޭން ބޭރަށް ދިއުމަށް މިނިސްޓްރީގައި އެދެމުން އަންނަ ކަމަށް ހަޔަރ އެޑިއުކޭޝަނުން ބުނެއެވެ.
އެހެންކަމުން އެނބުރި ކިޔަވަން ދިއުމުގެ ކުރިން ވެކްސިންގެ ފުރަތަމަ ޑޯޒް ޖެހުމަށްފަހު މަދުވެގެން ހަތަރު ހަފްތާ ހަމަކޮށް ވެކްސިންގެ ދެވަނަ ޑޯޒް ޖެހޭނެ މުއްދަތު އޮތް ދަރިވަރުން ރަޖިސްޓްރީވާން މިހާރު ވަނީ ހުޅުވާލައިފައެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާންމު ކޮށްފައިވާ ޑޭޓާއަށް ބަލާއިރު 5،204 މީހުންނަށް މިއަދު ކޮވިޑަށް ވެކްސިން ދީފައި ވެއެވެ. އަދި މިހާތަނަށް މުޅި ރާއްޖެއިން ޖުމްލަ 43،817 މީހުންނަށް ވެކްސިން ދީފައި ވެއެވެ.
މާލެ ސަރަޙައްދުގައި ވެކްސިން ދިނުމަށް ގާއިމް ކޮށްފައިވާ 6 ސެންޓަރުން މިހާތަނަށް ޖުމްލަ 35،289 މީހުންނަށް ވެކްސިން ދީފައިވާއިރު އަތޮޅުތެރޭގެ ދެ ސެންޓަރުން މިހާތަނަށް ޖުމްލަ 8،429 މީހަކަށް ވެކްސިން ދީފައި ވެއެވެ. އަދި ރިސޯޓުތަކުން 99 މީހަކަށް ވެކްސިން ދީފައިވެއެވެ.
ރާއްޖޭގައި މިހާރު ދެމުން އަންނަނީ އިންޑިއާގައި އުފައްދާފައިވާ އޮކްސްފޯޑް-އެސްޓްރެޒެނިކާގެ ވެކްސިނެވެ.
