ޖިހާދުގެ ޕާސްޕޯޓު މައްސަލައިގައި ސުޕްރީމް ކޯޓުގެ ނިންމުމަށް އިހުތިރާމު ކުރަން: ޝަމީމް
ކުރީގެ ނައިބު ރައީސް އަބްދުﷲ ޖިހާދު ފުރުން މަނާ ކުރުމުގެ އަމުރާ ގުޅޭގޮތުން ސުޕްރީމް ކޯޓުން ނިންމި ނިންމުމަށް އިހުތިރާމް ކުރާ ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވެއްޖެ އެވެ.
ޝަމީމް ކުރެއްވި ޓްވީޓެއްގައި ވަނީ ފުރުން މަނާ ކުރުމުގެ އަމުރާ ގުޅޭގޮތުން ސުޕްރީމް ކޯޓުގެ ނިންމުމަށާއި މާނަ ކުރެއްވުމަށް އިޙްތިރާމް ކުރައްވާ ކަމަށެވެ. އަދި ޢަމަލީ ގޮތުން ދިމާވާ މައްސަލަތައް ޙައްލު ކުރުމަށް ޤާނޫނަށް ގެނެވޭނެ އިޞްލާޙެއް އޮތްތޯ ބަލަން ބަންޑާރަ ނައިބާ މަޝްވަރާ ކުރައްވާނެ ކަމަށް ޝަމީމް ވިދާޅުވިއެވެ.
ކްރިމިނަލް ކޯޓުން ޖިހާދުގެ ފުރުން މަނާކޮށް، ޖިހާދުގެ ޕާސްޕޯޓް ހިފެހެއްޓުމަށް ނެރުނު އަމުރު، ޖިހާދުގެ ފަރާތުން ހައިކޯޓުގައި އިސްތިއުނާފް ކުރުމުން، ނިމުނު ޖެނުއަރީ މަހުގެ 13 ވަނަ ދުވަހު ހައިކޯޓުން ވަނީ ކްރިމިނަލް ކޯޓުން ނެރެފައިވާ އަމުރު ބާތިލްކަމަށް ނިންމާފައެވެ.
މި މައްސަލައިގައި ހައި ކޯޓުން ކުރި ޙުކުމުގައި ބުނެފައި ވަނީ، ޖިހާދު ފުރުން މަނާކޮށް ކްރިމިނަލް ކޯޓުން ނެރެފައިވާ އަމުރަކީ ޝަރުއީ އަދި ޤާނޫނީ އުސޫލުތަކާ ޚިލާފަށް ނެރެފައިވާ އަމުރެއް ކަމަށެވެ.
އެއާއެކު ދައުލަތުން އެ މައްސަލަ ސުޕްރީމް ކޯޓުގައި އިސްތިއުނާފް ކުރިއެވެ. ސުޕްރީމް ކޯޓުން އެ މައްސަލައިގައި މިއަދު ކުރި ހުކުމުގައި ބުނެފައި ވަނީ މީހަކު ރާއްޖެއިން ބޭރަށް ދާ ދިޔުމަކީ ޕާސްޕޯޓު ހިފަހައްޓަން ޖެހޭ ހާލަތެއް ނޫން ކަމަށާއި ޖިނާއީ އިޖްރައާތުގެ ގާނޫނު އޮތް ގޮތުން ޕާސްޕޯޓް ހިފެހެއްޓުން ހުއްދަ ވަނީ ފިލާފާނެ ކަމަށް ބެލެވޭ ހާލަތްތަކުގައި އެކަނި ކަމަށެވެ.
އަދި ޖިހާދު ފުރާވަޑައިގަތުމުގެ ކުރިން އޭނާގެ ޕާސްޕޯޓް ހިފަހައްޓަން ދައުލަތުން އެދިފައި ނެތް ކަމަށާއި އަދި އޭނާ ފުރުން މަނާ ކުރުމުގެ އަމުރެއް ނެތް ކަމަށް އެ ހުކުމްގައި ވެއެވެ.
