އިންސާނުންގެ ދަތާ ވައްތަރު ދަތް ހުންނަ މަހެއް މަސްވެރިއަކު ބާނައިފި
އެމެރިކާ، ފްލޮރިޑާ: ފްލޮރިޑާގެ މަސްވެރިއަކު އިންސާނުންގެ ދަތާ ވައްތަރު ދަތް ހުންނަ މަހެއް ބާނައިފިއެެވެ.
މި މަސް ބޭނުމުން އޭނާއަށް ފުރަތަމަ ފާހަގަވީ ޒިބްރާއެއްގައި ހުންނަ ކަހަލަ ޑިޒައިނެއް އެ މަހުގައި ހުރި ކަމެވެ. އަދި އެކަމާ ހައިރާންވެ އަންތަރީސްވެފައި ހުއްޓައި އެއަށްވުރެ ބޮޑަށް އޭނާ ހައިރާންވީ މަހުގެ އަނގަ ހުޅުވާލުމާއެކު އޭގެ ދަތްތައް ފެނުމުންނެވެ. އެ ދަތްތަކަކީ އިންސާނުންގެ ހުންނަ ކަހަލަ ދަތް ކަމަށް އޭނާ ބުނެއެެވެ.
މީގެ އިތުުރުން، އެ މަހުގައި ދެ ވައްތަރެއްގެ ދަތް ހުރި ކަމަށާއި އެގޮތުން މިޔަރުގެ ދަތާ ވައްތަރު ދަތްތަކެއް ވެސް އެ މަހުގައި ހުރި ކަމަށް އޭނާ ބުންޏެވެ. އަދި އެއީ އޭނާއަށް މިހާތަނަށް ފެނުނު އެންމެ އާދަޔާޚިލާފު މަސް ކަމަށް ވެސް އޭނާ ބުނެއެެވެ.
މި މަހުގެ ނަމަކީ "ޝީޕްހެޑް" ކަަމަށާއި މިއީ އާންމުކޮށް ފެންނަ ބާވަތުގެ މަހެއް ނޫން ކަމަށް ވެސް އޭނާ ބުނެއެވެ.
ހަވާއީއަށް ނިސްބަތްވާ މަސްވެރިކަމާ ބެހޭ މާހިރަކު ވަނީ މި މަހުގައި އިންސާނާގެ ދަތާ ވައްތަރު ދަތް ހުންނަ ސަބަބު ކިޔައިދީފައެވެ. އެގޮތުން އޭނާ ބުނީ އެ މަސް އެކަހަލަ ދަތް ބޭނުން ކުރަނީ ކަކުނިފަދަ ހަރު އެއްޗެހި ކެއުމަށް ކަމަށެވެ. އަދި އެ މަސް ކައި އުޅެނީ އިހި، ޑިނގާ އަދި ކަކުނި ފަދަ އެއްޗެހި ކަމަށް ވެސް އޭނާ ވަނީ ބުނެފައެވެ.
