ކެމްޕެއިންކުރުމަށް ހަމަހަމަ ފުރުޞަތު ދިނުމަށް އީސީން އެޗްޕީއޭގައި އެދިއްޖެ
ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރާ ކެނޑިޑޭޓުންނަށް ކެމްޕެއިން ކުރުމަށް، އެފަދަ މާހައުލެއް ޤާއިމް ކޮށްދިނުމަށް އެ ކޮމިޝަނުން އެޗްޕީއޭގައި ދަންނަވައިފިއެވެ.
އިލެކްޝަންސްގެ ސިޓީގައި ބުނެފައި ވަނީ އިންތިޚާބުތަކާބެހޭ ޢާންމު ޤާނޫނު ދަށުން އިންތިޚާބަށް ކުރިމަތިލާފައިވާ ފަރާތްތަކަށް ތާއީދު ހޯދުމަށް މަސައްކަތް ކުރުމުގެ ޙައްޤު ލިބިފައިވާ ކަމަށާއި އެހެން ނަމަވެސް އިންތިޚާބަށް ތާއީދު ހޯދުމަށް ދަތުރުފަތުރު ކުރުމަށް ހުއްދަ ލިބުމުގައި އިދިކޮޅު ފަރާތްތަކަށް ދަތިތަކެއް ހުރި ކަމަށެވެ. އަދި ސަރުކާރުގެ އިސްވެރިންނާއި، ސަރުކާރު ޙިއްސާވާ ކުންފުނިތަކުގެ ވެރިން، ރަސްމީ ދަތުރުތަކުގައި ރަށްރަށަށް ގޮސް، އިންތިޚާބަށް ކުރިމަތިލާފައިވާ ބައެއް ފަރާތްތަކަށް ތާއީދު ހޯދުމަށް މަސައްކަތްކުރާކަން ވެސް އެ ސިޓީގައި ފާހަގަ ކޮށްފައިވެއެވެ.
ލޯކަލް ކައުންސިލް އިންތިހާބު ބާއްވަން ނިންމާފައި އޮތީ އަންނަ އޭޕްރިލް މަހުގެ 10 ވަނަ ދުވަހުއެވެ. އެ ތާރީޚުގައި އިންތިހާބު ބޭއްވުމަށް ކޮމިޝަނުން ނިންމީ އިންތިހާބުގެ ވަގުތީ ގާނޫނަށް ރައްޔިތުންގެ މަޖިލީހުން ގެނެސްފައިވާ އިސްލާހުތަކަށް ރިއާޔަތް ކުރުމަށްފަހުއެވެ.
ކައުންސިލް އިންތިޚާބަށް ސިޔާސީ ޕާޓީތަކާއި އަމިއްލަ ގޮތުން 4،172 އަށް ވުރެން ގިނަ މީހުން ކުރިމަތިލާފައިވާއިރު، މިހާތަނަށް 100 އަށް ވުރެން ގިނަ ކެނޑިޑޭޓަކު ވަނީ ނަން އަނބުރާ ނަގައިފައެވެ.
