ކެންޕެއިން ހަރަކާތުގައި މަދުވެގެން 6 ފޫޓް ދުރުމިނެއް، ފެންފުޅި ގެންދަން ޖެހޭނީ އަމިއްލައަށް
ލޯކަލް ކައުންސިލް އިންތިހާބުގައި ކެމްޕޭން ދަތުރުތަކަށް ރަށްރަށަށް ގޮސް އުޅުމުގެ ތެރޭގައި 6 ފޫޓުގެ ގައިދުރުކަމެއް އިސްކުރަން ޖެހޭނެ ކަމަށާއި ކެއިންބުއިން ފަދަ ކަންކަން އިންތިޒާމު ކުރާއިރު، ބޭނުން ކުރާ ފެންފުޅި ގެންދަން ޖެހޭނީ ހަފްލާތަކަށް ދާ މީހުން އެމީހުންގެ ގެއިން ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކަނޑައަޅައިފިއެވެ.
އެޗްޕީއޭއިން އާންމު ކޮށްފައިވާ ކޮވިޑް-19ގެ ހާލަތުގައި ރައްކާތެރިކަމާއެކު ކެނޑިޑޭޓުން ތާއިދު ހޯދުމުގައި ޢަމަލު ކުރުމަށް ކަނޑައަޅާ ޚާއްސަ ގައިޑްލައިންގައި ބުނެފައިވާ ގޮތުން މިފަދަ ދަތުރުގައި 5 މީހުންނަށްވުރެ ގިނަ ނުވާ އަދަދަކަށް މީހުން ބައިވެރި ކުރެވޭއިރު، މިގޮތުން ކުރު މުއްދަތަށް ކުރާ ދަތުރުތަކުގައި ދޮރުންދޮރަށް ޒިޔާރަތް ކުރުން މަނާ ވާނެއެވެ.
އަދި ކެމްޕޭނު ބަައްދަލުވުންތަކާއި ހަރަކާތްތައް ބޭއްވުމުގައި އަމަލުކުރަން ޖެހޭ އުސޫލެއް ވެސް ވަނީ ކަނޑަޅައި އާންމު ކޮށްފައެވެ. އެގޮތުން ކެމްޕެއިނު ބައްދަލުވުންތަކާއި ހަރަކާތްތައް ހާމަ ތަންތަނުގައި ބާއްވަން ޖެހޭއިރު، މިފަދަ ޖަލްސާތަކުގައި ވަކި ވަކިން މީހުންނާ ބައްދަލު ކުރުން މަނާ ވާނެއެވެ.
އަދި މި ބައްދަލުވުން ތެރޭގައި ހާއްސަ ހުއްދައިގެ ދަށުން ދާ ފަރާތްތަކާއި 6 ފޫޓުގެ ދުރުމިނެއް ބަހައްޓަން ޖެހޭއިރު އެންމެންނާއި ކެންޑިޑޭޓް/ޓީމް އަބަދު ވެސް އަނގަޔާއި ނޭފަތް ނިވާ ވާގޮތަށް މާސްކް އަޅައިގެން ތިބުމާއި މާސްކް އެޅުމުގެ އުސޫލުތަކާ އެއްގޮތަށް އަމަލު ކުރުމަށް އެޗްޕީއޭގެ އުސޫލުގައި ވަނީ ބަޔާން ކޮށްފައެވެ.
މީގެ އިތުރުން ވެސް ޖަލްސާތައް ބޭއްވުމުގައި ތިރީގައިވާ ގޮތަށް އަމަލު ކުރުމަށް އެޗްޕީއޭއިން ވަނީ ކަނޑައަޅާފައެވެ.
o ބައްދަލުވުމުގެ ބައިވެރިންނާ ގާތްވެ ބައްދަލު ނުކުރުން އަދި އަތާ އަތްޖޯޑުކޮށް ސަލާމް ނުކުރުން.
o ބައްދަލުވުންތަކުގައި ކެއުމުގެ އިންތިޒާމް ހަމަނުޖެއްސުން. ބައްދަލުވުމުގެ ބައިވެރިން އަމިއްލަ ފެންފުޅި
ބޭނުން ކުރުން.
o ތަނުގައި ހުންނަ ތަކެތީގައި ނުވަތަ ތަންތަނުގައި އަތްލުން މަދުކުރުން އަދި އަތް ސާފުނުކޮށް މާސްކާއި
ނޭފަތާއި އަނގަޔާއި ލޮލުގައި އަތް ނުލުން.
o މާސްކް، ޓިޝޫ ފަދަ ތަކެތި ރައްކާތެރިގޮތުގައި ކަނޑައަޅާފައިވާ ޑަސްބިނަށް އުކާލުން.
o ބައްދަލުވުން ނިމުމަށްފަހު ތަނުގައި މަޑު ނުކުރުމާއި ހުރުމަށް ހަމަޖެހިފައިވާ ތަނަށް ވީހާވެސް އަވަހަށް
ދިއުން.
o ގިނަގިނައިން ހޭންޑް ސެނިޓައިޒަރ ބޭނުން ކޮށްގެން އަތް ސާފުކުރުން.
o ވަކިވަކިން މީހުންނާ ނުވަތަ ގްރޫޕްތަކާ ބައްދަލު ކުރާނަމަ ވަރޗުއަލްކޮށް އެފަދަ ބައްދަލުކުރުންތައް
ހަމަޖެއްސުން
o މޮނިޓަރިންގ ހާލަތުގައިވާ ރަށެއްގައިނަމަ ހުރިހާ ބައްދަލުވުމެއް ހަމައެކަނި ވަރޗުއަލްކޮށް ބޭއްވުން.
ކަރަންޓީނުވުމަކާ ނުލާ ކުރުމުއްދަތަށް 5 ދުވަހަށްވުރެ ދިގު ނޫން މުއްދަތަކަށް އެއްރަށުން އަނެއްރަށަށް ދަތުރުކުރަން އެޗްޕީއޭއިން ވަނީ ޚާއްސަ އުސޫލުތަކާއެކު ހުއްދަ ދީފައެވެ. އެޗްޕީއޭއިން އެކުލަވާލާފައިވާ ގައިޑްލައިންތަކާ ޚިލާފުވެއްޖެނަމަ، އިތުރު ހުއްދައެއް ނުދެވޭނެއެވެ. އަދި 5 ދުވަހަށްވުރެ ގިނަ މުއްދަތަށް ދަތުރުކުރާނަމަ 10 ދުވަހުގެ މުއްދަތަށް ކަރަންޓީނު ވާން ޖެހޭނެއެވެ.
