ޕީޕީއެމް އޮފީސް ދޮށުގައި ފުލުހުން ހަރަކާތްތެރިވާތީ އިދިކޮޅުން އިލެކްޝަންސްއަށް
އިދިކޮޅު ޕީޕީއެމް އޮފީސް ދޮށުގައި ފުލުހުން ހަރަކާތްތެރިވާތީ އެޕާޓީގެ މަސައްކަތްތަކަށް ހުރަސް އެޅޭ ކަމަށް ބުނެ، އެޕާޓީން އިލެކްޝަންސް ކޮމިޝަނަށް މައްސަލައެއް ހުށަހަޅައިފިއެވެ.
ޕީޕީއެމްއިން އެކޮމިޝަނަށް ހުށަހެޅި މައްސަލައިގައި ވަނީ ލޯކަލް ކައުންސިލް ތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގެ ވޯޓު ނެގުން އަންނަ އޭޕްރީލް މަހުގެ 10 ވަނަ ދުވަހު ބޭއްވުމަށް ހަމަޖެހިފައިވާއިރު، އިންތިޚާބާ ގުޅޭ ގޮތުން ކުރަން ޖެހޭ އިދާރީ މަސައްކަތްތަކާއި އަދި އެހެނިހެން ގިނަ މަސައްކަތްތަކަށް ސަރުކާރުން ހުރަސް އަޅަމުން ގެންދާތީ، އެކަން ހުއްޓުވައިދިނުމަށް އެދޭ ކަމަށެވެ.
އެގޮތުން ކޮންމެ ހުކުރު ދުވަހެއްގެ މެންދުރު ފަހު 2:00 އިން ފެށިގެން ރޭގަނޑު ވަރަށް ދަންވަންދެން ފުލުހުން މެދުވެރިކޮށް ޕާޓީ އޮފީހަށް އައިސް ގޮސް އުޅޭ މީހުންނަށް އޮފީހަށް ނުވަދެވޭ ގޮތަށް އޮފީސް ބަންދު ކޮށްފައި ހުރުމާއި ޕާޓީ އޮފީހަށް ދަތުރު ކުރާ މަގު، ބޮޑުތަކުރުފާނު މަގު، މަޖީދީ މަގު ކަންމަތިން ފެށިގެން ގޮސް ހިތިގަސް މަގު ބޮޑުފުންގަނޑު މަގު ކަންމައްޗާއި ހަމައަށް ބަންދުކޮށްފައި ހުންނަ ކަން ފާހަގަކޮށް މިކަން ހުއްޓުވައިދިނުމަށް ވެސް ޕީޕީއެމްއިން ވަނީ އެދިފައެވެ.
މީގެ އިތުރުން ލޯކަލް ކައުންސިލް އިންތިހާބުގެ ރީރަޖިސްޓްރޭޝަން ފޯމުތައް ހުށަހެޅުމުގެ މަސައްކަތްތައް ކުރެވެމުން ދިޔައިރުވެސް ސަރުކާރުން ޕީޕީއެމްގެ ފަރާތުން ކުރަމުން ގެންދިޔަ އިންތިޚާބީ މަސައްކަތްތަކަށް ވެސް ހުރަސް އަޅާފައިވާ ކަން އެ މައްސަލައިގައި ވަނީ ފާހަގަ ކޮށްފައެވެ.
އަދި މިކަން މިމަގުން ކުރާކަން ވަރަށް ފާޅުކަން ބޮޑު ގޮތެއްގައި މީޑިއާތަކުން ހާމަ ކުރަމުން ގެންދާއިރު ވެސް، އިލެކްޝަންސް ކޮމިޝަނުން މިކަން ޙައްލު ކުރުމަށް އެއްވެސް ފިޔަވަޅެއް އަޅުއްވައި ދެއްވާފައި ނުވާކަން ހިތާމައާއެކު ފާހަގަކޮށް ޕީޕީއެމްއިން ވަނީ މިކަމަކީ އެޕާޓީން އިންތިޚާބާ ގުޅިގެން ކުރަމުން ގެންދާ އިދާރީ އަދި ޢަމަލީ ހުރިހާ މަސައްކަތަކަށް ހުރަސް އަޅާ، އިންތިޚާބަށް ނުފޫޒު ފޯރުވުމުގެ ޢަމަލެއް ކަމުގައި ދެކޭ ކަމަށް ވެސް ބުނެފައެވެ.
އަދި މިފަދަ ކަންކަން ހުއްޓުވައިދީ ޤާނޫނު އަސާސީން ލާޒިމު ކުރާ ޒިންމާ މަސްޢޫލިއްޔަތު އަދާ ކުރައްވާ، މިކަން ހުއްޓުވައި ދެއްވުމަށާއި، އިންތިޚާބުގައި ހުރިހާ ޕާޓީއަކަށާއި ކެންޑިޑޭޓުންނަށް ހަމަހަމަ ކަމާ މިނިވަން ކަމާ އެކު މަސައްކަތް ކުރެވޭނެ މާހައުލެއް ގާއިމް ކޮށްދިނުމަށް ޕީޕީއެމް އިން ވަނީ އިލެކްޝަންސް ކޮމިޝަނުގައި އެދިފައެވެ.
