ރާއްޖޭގެ ރީތިކަމުގެ ޖާދުލުގައި ޖެހި 60 ފަހަރަށް ޒިޔާރަތްކުރި މި ދެމަފިރިންގެ އުންމީދަކީ 100 ޒިޔާރަތް ހަމަކުރުން!
ދިވެހިރާއްޖޭގެ ފަތުރުވެރިކަމަށް ބަލާލާއިރު، ރާއްޖެއަށް ޒިޔާރަތް ކުރާ ފަތުރުވެރިން މަދެއް ނޫނެވެ. އަދި ތަކުރާރުކޮށް ރާއްޖެއަށް ޒިޔާރަތް ކުރަމުން އަންނަ ފަތުރުވެރިން ވެސް އިންތިހާއަށް ގިނައެވެ.
ނަމަވެސް ފްރާންސަށް ނިސްބަތްވާ ސާޖް ޑިސޯ (މިސްޓަ ބީން) އާއި ޖޮސެލް ޑިސޯ ވަނީ އެހެން ފަތުރުވެރިންނަށް ވުރެ ބޮޑަށް އެކަމުގައި ކުރި ހޯދާފައެވެ. އެ ދެމަފިރިން މިހާރު ވަނީ 60 ފަހަރަށް ރާއްޖެއަށް ޒިޔާރަތް ކޮށްފައެވެ.
އެނގިފައިވާ ގޮތުގައި މި ދެމަފިރިން ރާއްޖެއަށް އެންމެ ފުރަތަމަ އައިސްފައިވަ ނީ މީގެ 27 އަހަރު ކުރިން 1994 ވަނަ އަހަރުގައެވެ.
އޭގެފަހުން އެތައް ފަހަރަކު ރާއްޖެއަށް ޒިޔާރަތްކޮށް މިސްޓަ ބީން އާއި ޖޮސެލް ޑިސޯ މިވަގުތު ވެސް ތިބީ ރާއްޖޭގެ ރިސޯޓެއްގައި ޗުއްޓީ ހޭދަ ކުރާށެވެ.
އެގޮތުން އެ ދެމަފިރިންނަށް މިއަދު ހޫނު މަރުހަބާއެއް ކިޔުމަށް ކޮކޯ ޕާމްގައި ބޭއްވި ޚާއްސަ ރަސްމިއްޔާތެއްގައި ޓޫރިޒަމް މިނިސްޓަރ ޑރ. ޢަބްދުﷲ މައުސޫމް ވެސް ވަނީ ބައިވެރިވެ ވަޑައިގެންފައެވެ.
"މިސްޓަ ބީން ބުނީ އެ ދެމަފިރިން ބޭނުން ވަނީ ރާއްޖެއަށް އެންމެ ފުރަތަމަ 100 ދަތުރު ކުރި މީހުންނަށް ވާން ކަމަށް. ކޮންމެ އަހަރަކު ރާއްޖެ އަށް މަދުވެގެން ތިން ދަތުރު އެބަކުރޭ." ޑރ. މައުސޫމް ވިދާޅުވިއެވެ.
މިއަަހަރުގެ ޖެނުއަރީ މަހު ވެސް ރާއްޖެއަށް ޒިޔާރަތްކުރި މި ދެމަފިރިން، ދެ މަސް ފަހުން އަނެއްކާ ވެސް ޗުއްޓީ ހޭދަ ކުރުމަށް އެނބުރި އައީ ރާއްޖެ ދެކެ ވާ ލޯތްބެއްގެ ބޮޑުކަމުން ކަމަށް އެ ދެމަފިރިން ބުނެފައި ވެއެވެ.
