ފެރީ ހިދުމަތަށް މުވައްޒަފުން ހޯދަން ޖުލައި މަހު އިޢުލާން ކުރަނީ
ހައި ސްޕީޑް ފެރީ ނެޓްވޯކަކުން ރާއްޖެ ގުޅައިލުމަށް ފަރުމާ ކޮށްފައިވާ އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކު މަޝްރޫއުގެ ފުރަތަމަ ފިޔަވަހީގެ ދަތުރުތައް ނޮވެމްބަރު މަހު ފެށުމަށް ބޭނުންވާ މުވައްޒަފުން ހޯދުމަށް ޖުލައި މަހު އިއުލާނު ކުރާނެ ކަމަށް އެމްޓިސީސީ އިން ބުނެފިއެވެ.
މުވައްޒަފުން ހޯދުމަށް އިއުލާން ކުރާއިރު އޮޕަރޭޓަރުންގެ ގޮތުގައި 34 މުވައްޒަފުން، ކްރޫ އިންގެ ގޮތުގައި 36 މުވައްޒަފުން، އެޑްމިނިސްޓްރޭޓިވް ސްޓާފުންގެ ގޮތުގައި 11 މުވައްޒަފުން ހިމެނޭހެން ޖުމްލަ 81 މުވައްޒަފުން ބޭނުންވާ ކަމަށް އެމްޓީސީސީގެ މެނޭޖިން ޑިރެކްޓަރު އާދަމް އާޒިމް ވިދާޅުވިއެވެ.
މީގެ އިިތުރުން އާޒިމް ވިދާޅުވީ އެ މަސައްކަތަށް މުވައްޒަފުން ނެގުމުގައި އިސްކަންދޭނީ އެ އަތޮޅަކުން މުވައްޒަފުން ނެގުމަށް ކަމަށެވެ. އެގޮތުން އޮޕަރޭޓަރުންގެ ގޮތުގައި ލޯންޗު މުވައްޒަފުން ބޭނުން ވާއިރު އެ ކުންފުނިން އިސްކަން ދޭނީ އެ ސަރަހައްދެއްގައި އެކަމުގެ ތަޖުރިބާ ހުރި ބޭފުޅުން ތިބި ނަމަ އެ ބޭފުޅުންނަށް ކަމަށް ވެސް އޭނާ ވިދާޅުވިއެވެ.
"ލައިސަންސް ނެތް ބޭފުޅުންނަށްވެސް ލައިސަންސް ނަގައިދީގެން އެކަން ކުރަން އަޅުގަނޑުމެން ބޮޑަށް ބޭނުންވަނީ. ސަރުކާރުގެވެސް އަމާޒަކީ އާއިލާ ކައިރީ ރަށުގައި ތިބެގެން ވަޒީފާއަދާކުރުމުގެ ފުރުސަތު ދިނުން،"
އާޒިމް
ހަމަ އެހެންމެ ޖުލައި މަހުގެ ތެރޭގައި މުވައްޒަފުން ނެގުމަށްފަހު މުވައްޒަފުންނަށް ތަމްރީން ދެވޭނެ ކަމަށާއި އެގޮތުން 1 އޮކްޓޯބަރުން ފަށައިގެން މުވައްޒަފުންނަށް އިންޑަކްޝަން ޕްރޮގްރާމްތައް ހިންގާނެ ކަމުގައި ވެސް އާޒިމް ފާހަގަ ކުރެއްވިއެވެ،
ފެރީ ނެޓްވޯކުގެ ހިދުމަތް ދިނުމަށް ސޮއިކުރި އެއްބަސްވުމުގެ ދަށުން ހއ، ހދ އަދި ށ އަތޮޅުގެ ރަށްތައް ޒަމާނީ އަގުހެޔޮ ހައިސްޕީޑު ފެރީގެ ނިޒާމަކުން ގުޅާލާނެ އެވެ..
އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކަކީ މުޅި ރާއްޖެއަށް އަމާޒުކޮށް ފަސިންޖަރުން އަދި މުދާ އުފުލާ ފެރީ ހިމެނޭ ގޮތަށް، "ނޭޝަނަލް ސްޕޭޝަލް ޕްލޭން 2020-2040" ގައި ހިމެނޭ ތިން ޒޯން އާއި ހަ ރީޖަން ގުޅާލުމަށް ފަރުމާކޮށްފައިވާ ވިއުގައެކެވެ.
އެގޮތުން ފެރީ ނެޓްވޯކްއިން ހަ ރީޖަންގައި އެކުލެވޭ ހުރިހާ ރަށްތަކެއް ގުޅާލާއިރު، އެއް ރީޖަން އަނެއް ރީޖަންއާ ވެސް ގުޅިގެންދާނެ އެވެ. މި ގޮތަށް ފަސިންޖަރުން އުފުލާ ފެރީ ގުޅާލަނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް،" "ނަން-ކޮމިއުޓް ލިންކް،" އަދި "ހައިވޭ ލިންކް" މެދުވެރިކޮށެވެ.
ކޮމިއުޓް ލިންކްއަކީ އެ ރީޖަންއެއްގައި ހިމެނޭ ރަށްތައް ގުޅުވައިދޭ، އާންމުކޮށް ކުރަންޖެހޭ މަސައްކަތް ނުވަތަ ޒަރޫރީ ބޭނުންތަކަށް ކުރާ ކުރު ދަތުރުތަކަށް ހާއްސަ ލިންކެކެވެ. ނަން-ކޮމިއުޓް ލިންކަކީ ދެ ރަށެއްގެ ދެމެދުގައި ކުރާ، ދިގު ދަތުރުތަކަށް ހާއްސަ ލިންކެވެ. އަދި ހައިވޭ ލިންކްއަކީ އެއް ރީޖަން އަނެއް ރީޖަންއާ ގުޅުވައިދޭ މައި ދަތުރުފަތުރުގެ ހަބެވެ.
އިއުލާނު ކުރީމަ ވޯޓު ދެވޭނީ. ދެނޯ!