މުޒާހަރާއިން ހައްޔަރުކުރި 23 މީހަކު ދޫކޮށްލައިފި
އިދިކޮޅުން ކޮންމެ ހުކުރު ދުވަހަކު ވެސް އަންނަނީ ސިލްސިލާ މުޒާހަރާ ތަކުގެ ތެރެއިން، އިއްޔެ ކުރި މުޒާހަރާގައި ހައްޔަރުކުރި 23 މީހަކު ބަންދުން ދޫކޮށްލައިފިއެވެ.
ފުލުހުން ވިދާޅުވީ މުޒާހަރާގެ ތެރެއިން ޖުމްލަ 25 މީހަކު ހައްޔަރު ކުރި ކަމަށާއި އޭގެ ތެރެއިން 23 މީހަކު ދޫކޮށްލާފައި ވަނީ ޖޫރިމަނާ ކުރުމަށް ފަހުގައި ކަމަށެވެ.
އަދި މިވަގުތު ފުލުހުންގެ ބެލުމުގެ ދަށުގައި ތިބި ދެ މީހުންނަކީ ފުލުހުންނަށް ހަމަލާ ދިނުމުގެ ސަބަބުން ހައްޔަރުކުރި ދެމީހުން ކަމަށް ވެސް ފުލުހުންގެ މީީޑިއާ އޮފިޝަލް ވިދާޅުވިއެވެ.
އިދިކޮޅު ފަރާތްތަކުން މާލޭގައި މުޒާހަރާ ކުރަން ނިންމާފައި ވަނީ މާލޭ ސަރަހައްދުގައި 5 މީހުންނަށްވުރެ ގިނަ މީހުން އެއްތަން ނުވުމަށް އަންގާފައި ވަނިކޮށެވެ. ފުލުހުން ވަނީ މުޒާހަރާތަކަކީ ޤާނޫނާ ޚިލާފު މުޒާހަރާތަކެއް ކަމަށް ނިންމާ، މުޒާހަރާ އިންޒާރަކާ ނުލާ ރޫޅާލާނެ ކަމަށް ނިންމާފައެވެ.
ފުލުހުން ވަނީ އިއްޔެ ހަވީރު ޕީޕީއެމް އޮފީސް ހިމެނޭ ސަރަހައްދުގެ ހުރިހާ މަގެއް ވަނީ ބަންދު ކޮށްފައެވެ. އެގޮތުން މަޖީދީމަގާއި ބޭރުމަގު ގުޅޭ ކަންމަތިން ބަންދު ކޮށްފައިވާއިރު ނިއުޕޯޓް ވިއު ކައިރިން ވެސް ބަންދު ކުރިއެވެ.
އިދިކޮޅުން ކުރަމުންދާ މުޒާހަރާތަކުގައި ކޮންމެ ދުވަހެއްގެ ވެސް ގިނަ ބަޔަކު ހައްޔަރުކުރި ނަމަވެސް، ޖޫރިމަނާކުރުމަށް ފަހު ދޫކުރެއެވެ.
