މިހާރު އޮތީ ސިއްހީ ކުއްލި ނުރައްކަލުގެ ހާލަތެއްތޯ ސަލީމް ސުވާލު އުފައްދައިފި
ކޮވިޑް-19 ކޮންޓްރޯލް ކުރަން ރާއްޖޭގައި މިދިޔަ އަހަރު އިއުލާން ކުރި ސިއްހީ ކުއްލި ނުރައްކަލުުގެ ހާލަތު ދަމަހައްޓާތީ ކަންބޮޑުވުން ފާޅުކުރައްވައި އަދިވެސް ރާއްޖެގައި އޮތީ އެ ހާލަތު ކަމާމެދު، ހޯރަފުށީ ދާއިރާގެ މަޖިލިސް މެމްބަރު އަހްމަދު ސަލީމް މިއަދު ސުވާލު އުފައްދަވައިފިއެވެ.
ސަލީމް މިހެން ވިދާޅުވެފައި ވަނީ މިއަދު ކުރިޔަށް ދިޔަ ރައްޔިތުންގެ މަޖިލިސް ޖަލްސާގައި ވާހަކަފުޅު ދައްކަވަމުންނެވެ. މިހާރު އަޅާފައިވާ ފިޔަވަޅުތަކުގެ ސަބަބުން ކުދި ވިޔަފާރިތަކަށް ލިބޭ ގެއްލުން ސަރުކާރުގެ ސަމާލުކަމަށް ގެންނަން ހުށައެޅުއްވި މައްސަލާގައި ވާހަކަ ދައްކަވަމުން ސަލީމް ވިދާޅުވީ އެކަމުގެ ސަބަބުން ވިޔަފާރިތައް މުޅިން ހުއްޓި އިގްތިސޯދަށް ވެސް ގެއްލުން ވަމުން އަންނަ ކަމަށެވެ.
މީގެ އިތުރުން ، ހޮޓާ، ކެފެޓޭރިއާ އަދި ރެސްޓޯރަންޓުތަކަކީ އާންމުންގެ ތެރެއިން ގިނަބަޔަކު ކެއިން ބުއިމަށް ބަރޯސާވާ ތަންތަން ކަމަށާއި އެހެންކަމުން މިހާރު އަޅާފައިވާ ފިޔަވަޅުތަކުގެ ސަބަބުން ވިޔަފާރިތައް މުޅިން ބަނގުރޫޓުވަމުންދާ ކަމަށް ވެސް އޭނާ ވިދާޅުވިއެވެ.
“"ކުއްލި ނުރައްކަލަކީ ކުއްލިއަކަށް ދިމާވާ ހާލަތަކަށް އަޅުގަނޑުމެން ކިޔާ އެއްޗެއް. އެ ހާލަތުގައި އަޅުގަނޑުމެން އުޅެ، ހޭނި، އެއް އަހަރު ވެގެން ދިޔައިމާ އަދިވެސް އެ ހާލަތަށް ކުއްލި ނުރައްކަލުގެ ހާލަތު ކިއިދާނެތޯ އެއީ އަަޅުގަނޑުގެ ހިތުގައި އުފެދޭ ވަރަށް ބޮޑު ސުވާލެއް” ސަލީމް ވިދާޅުވިއެވެ.
