ދައްތައެއްގެ ދަރަޖަ ލިބުނީ ޝާހީންގެ ފަރާތުން އެކަނި: ޕޫޖާ ބަޓް
ބޮލީވުޑްގެ ކުޅަދާނަ އެކްޓްރެސް ޕޫޖާ ބަޓް އަށް ދައްތައެއްގެ ދަރަޖަ ލިބުނީ ހަމައެކަނި އޭނާގެ އެއްބަފާ ކޮއްކޮ ޝާހީން ބަޓް ގެ ފަރާތުން ކަމަށް އޭނާ ބުނެފިއެވެ.
ނެޓްފްލިކްސް އިންޑިއާ އިން ޕޫޖާ ބަޓްއާ ދާދި ފަހުން ކޮށްފައިވާ ސުވާލުތަކަށް ޖަވާބު ދެމުން އޭނާ ބުނީ، އޭނާއަކީ އެންމެ ދޮށީ ދައްތަކަމުގެ އިޙުސާސް ، ޝާހީން އަބަދުވެސް ކޮށްދިން ކަމަށާއި ޕޫޖާއަކީ ޝާހީން އަށް މުހިންމު މީހެއް ކަމަށް ވެސް އިހުސާސް ކޮށްދިން ކަމަށެވެ.
ބޮލީވުޑްގައި މިހާރު ވިދަމުން އަންނަ ތަރި އާލިއާ ބަޓް އަކީ ވެސް ޕޫޖާގެ އެއްބަފާ ކޮއްކޮ އެކެވެ. ނަމަވެސް އާލިއާއާ ބެހޭ ގޮތުން ޕޫޖާ އެފަދައިން ތައުރީފު ކޮށްފައެއް ނުވެއެވެ.
މީގެ އިތުރުން މިމަހުގެ 15 ވަނަ ދުވަހު އާލިއާގެ އުފަން ދުވަސް ފާހަގަ ކުރިއިރު، އާލިއާ ވަނީ އޭނާއަށް އުފަން ދުވަހުގެ ތަހުނިޔާ ފޮނުވި އެންމެންގެ މެސެޖުތައް އިންސްޓަގްރާމް ސްޓޯރީގައި ހިއްސާ ކޮށްފައެވެ. ނަމަވެސް ޕޫޖާ އޭނައަށް ފޮނުވި ތަހުނިޔާ ފެންނަން ނެތްކަން ބައެއް މީހުން ފާހަގަ ކުރިއެވެ. އަދި އާލިއާ އަށް އެންމެ މުހިންމު އަންހެނުން ކަމަށް ބުނެ ފޮޓޯއެއް ހިއްސާ ކޮށްފައިވާއިރު، އޭގައި ވެސް ޕޫޖާ ބަޓް ނުހިމެނޭކަން ބައެއް މީހުން ވަނީ ފާހަގަ ކޮށްފައެވެ.
ޕޫޖާ ބަޓް އަކީ 90ގެ އަހަރުތަކުގައި ވަރަށް ވިދާލި ތަރިއެކެވެ. އެކްޓު ކުރުމުން ދިގު މުއްދަތަކަށް ބްރޭކެއް ނެގުމަށްފަހު ޕޫޖާ އަލުން އެ ދާއިރާއާއި ގުޅިފައި ވަނީ ނެޓްފްލިކްސް އިން މިއަހަރު ދައްކަމުން ގެންދާ "ބޮމްބޭ ބޭގަމްސް" ސީރީޒުންނެވެ.
