ފޮޓޯ ނަގަން ތައްޔާރުވީ، އަތަށް ލައިގެން ހުރެވުނު އެއްޗެއްގެ ނުރައްކާތެރިކަން ނޭނގި
ބާލީއަށް ދިޔަ ފަތުރުވެރިއަކު ފޮޓޯއެއް ނެގުމަށް ކުރި ކަމަކުން އޭނަގެ ފުރާނަ ސަލާމަތްވީ ހަމަ ކިރިޔާއެވެ.
ކޭލިން މަރީ ނަމަކަށް ކިޔާ ޓިކްޓޮކް ސްޓާރެއް އޭނަގެ އެކިވެރިންނާއެކު ބާލީއަށް ގޮސް، އެތަނުގެ މޫދުން ނެގީ ކުޑަ ބޯވައެކެވެ. އެ ބޯވާ އޭނަގެ އަތް ތިލައަށްވުރެ ބޮޑު ނޫން ކަމަށް ރިޕޯޓުތަކުން ބުނެއެވެ.
ބޯވާ އަތަށް ލައިގެން ކޭލިން ވީޑިއޯ ކުރިއިރު، އޭނަގެ ރައްޓެހިން އެ ބޯވާގެ ގައިމައްޗަށް ފެން އަޅާ، މަޖާ ކުރަމުންދިޔަ މަންޒަރު ވެސް ވީޑިއޯއިން ފެނެއެވެ.
ވީޑިއޯކޮށް ފޮޓޯ ނަގައި ނިމުމަށްފަހު، އެއީ ކޮން ކަހަލަ ބޯވާއެއްތޯ ކޭލިން އިންޓަނެޓް މެދުވެރިކޮށް ބެލިއެވެ.
އޭނާ ހޯދި ހޯދުން ތަކުން އެނގުނީ އެއީ "ބްލޫ ރިންގްޑް" ބޯވާއެއް ކަމަށާއި އެބާވަތުގެ ބޯވާއަކީ ފުރާނައަށް ވަރަށް ނުރައްކާތެރި އެއްޗެއް ކަމަށެވެ.
އެެެބާވަތުގެ ބޯވާގައި އެކުލެވޭ ވިހައަކުން 26 މީހުން މަރާލުމުގެ ބާރު އެކުލެވޭ ކަމަށް ވެސް ރިޕޯޓުތަކުން ބުނެއެވެ. އަދި އެ ބޯވާތައް ކުދި ކަމުން، ބޯވާ ދަތް އެޅިޔަސް އެވަގުތު ނޭނގޭނެ ކަމަށް ވެސް ކޭލިން ހޯދި މައުލޫމާތުން ހާމަވެފައި ވެއެވެ.
