ވޯޓުގެ ސިއްރުކަން ގެއްލުނަސް، ވޯޓު ލެވޭނެ: އީސީ ޝަރީފް
ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި ވޯޓު ދޭއިރު، ސިއްރުކަން ގެއްލިފައިވާ ގޮތަކަށް ރެޖިސްޓްރީ ވެފައިވާ ނަމަވެސް ވޯޓު ދެވޭނެ ކަމުގައި އިލެކްޝަންސް ކޮމިޝަންސް (އީސީ)ގެ ރައީސް އަހުމަދު ޝަރީފް ވިދާޅުވެއްޖެއެވެ.
އީސީ ޝަރީފް މިހެން ވިދާޅުވެފައިވާއިރު އިންތިޚާބުގައި ވޯޓުގެ ސިއްރުކަން ގެއްލޭ ގޮތަށް ރަޖިސްޓްރީވެފައި ތިބި މީހުންނަށް ރީ-ރަޖިސްޓްރީވުމުގެ ފުރުސަތު ހުޅުވާލާފައި ވަނީ އެންމެ 24 ގަޑިއިރަށެވެ.
ކޮމިޝަންގެ ރަައީސް އަހުމަދު ޝަރީފް އާދަމް ވިދާޅުވީ ވޯޓްގެ ސިއްރުކަން ގެއްލުނަސް މިހާރު ރަޖިސްޓްރީ ކޮށްފައިވާ ތަނަކަށް އެމީހަކަށް ވޯޓް ލާން ފުރުސަތު ދޭނެ ކަމަށެވެ. ވޯޓް ސިއްރު ނުވާނަމަ އެމީހަކަށް ވޯޓް ނުލެވޭނެ ކަމަށް ބައެއް މީހުން ވާހަކަ ފަތުރަމުންދާ ކަމަށާ ނަމަވެސް އެއީ އެކަން އޮތް ގޮތް ނޫން ކަމަށް ވެސް ވިދާޅުވި އެވެ.
މިއަދުގެ ނިޔަލަށް، ރީރެޖިސްޓްރީ ކުރެވޭނީ އީސީން އާންމު ކޮށްފައިވާ ލިސްޓުގައިވާ މީހުންގެ ނަންތައް އެކަންޏެވެ. އެ ލިސްޓު ކޮމިޝަންގެ ވެބްސައިޓް (www.elections.gov.mv) ގައި އާންމު ކުރެވިފައިވާނެ ކަމަށް އީސީން ވިދާޅުވެއެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވޯޓުގެ ސިއްރުކަން ގެއްލޭ ފަދަ ގޮތަކަށް 8000 މީހުން ރީ-ރަޖިސްޓްރީ ކޮށްފައިވާކަމަށް އީސީން ވިދާޅުވެފައި ވެއެވެ.
އަންނަ އޭޕްރީލް މަހުގެ 10 ވަނަ ދުވަހު ބޭއްވުމަށް ތައްޔާރު ވަމުންދާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވޯޓްލުމުގެ ހައްޤު ލިބިފައިވާ މީހުންގެ އަދަދަކީ 273128 އެވެ.
