އާމިރް ޚާން ކޮވިޑަށް ފައްސިވެއްޖެ

ކޮވިޑް-19 އާ ގުޅިގެން ބޮލީވުޑްގެ ގިނަ ފިލްމުތަކެއްގެ މަސައްކަތްތަކެއް ވެސް މެދުކަނޑާލުމަށްފަހު، އަލުން ވަނީ އެމަސައްކަތްތައް ފަށާފައެވެ.

Ads by MWSC

ނަމަވެސް މި ފަހަކަށް އައިސް ބޮލީވުޑްގެ ގިނަ ތަރިންތަކެއް އަންނަނީ ކޮވިޑް-19 އަށް ފައްސިވަމުންނެވެ. އޭގެ ތެރޭގައި މަޝްހޫރު އެކްޓަރުން ކަމުގައިވާ ރަންބީރް ކަޕޫރާއި، ތާރާ ސުތާރިއާ އަދި ކާރްތިކް އާރްޔަން ގެ އިތުރުން ސަންޖޭ ލީލާ ބަންސާލީ، މަނޯޖް ބަޖްބާއީ އަދި ނިކީ ޓަމްބޯލީ ވެސް ހިމެނެއެވެ.

އެއަށް ފަހު މިއަދު އިންޑިއާގެ ޚަބަރު ތަކުން އެނގުނީ، ބޮލީވުޑްގައި މަޝްހޫރު އެތައް ފިލްމެއް ހަދާފައިވާ ކުޅަދާނަ އެކްޓަރު އާމިރް ޚާން ވެސް މިހާރު ކޮވިޑަށް ފައްސި ވެފައިވާ ކަމެވެ.

ރިޕޯޓުތަކުން ބުނާ ގޮތުގައި، ކޮވިޑަށް ފައްސިވުމާ ގުޅިގެން އާމިރް ޚާން މިވަގުތު ހުރީ ގޭގައި ކަރަންޓީނު ވެގެންނެވެ. އޭނާ ކޮވިޑަށް ފައްސިވީ ފިލްމު "ލާލް ސިންގް ޗައްޑާ" ގެ މަސައްކަތް އަލުން ފެށިތަނާ ކަމަށް ވެސް ރިޕޯޓުތަކުން ބުނެއެވެ.

ކޮވިޑަށް ފައްސިވުމުން އާމިރް ޚާން ކަރަންޓީނު ވެފައިވާއިރު، އޭނާގެ ހުރިހާ ސްޓާފުން ވެސް ބައްޔަށް ޓެސްޓު ކުރުމަށާއި ބަލިން ރައްކާތެރިވުމަށް އަޅަންޖެހޭ ހުރިހާ ފިޔަވަޅުތަކެއް އެޅުމަށް ސަމާލުކަމެއް ދިނުމަށް ވެސް އާމިރް ޚާން ބުނެފައިވެއެވެ.

އާމިރް ޚާންގެ އިތުރުން "ލާލް ސިންގް ޗައްޑާ" ގައި އުޅެނީ ކަރީނާ ކަޕޫރް ޚާން އެވެ. އެ ފިލްމުގެ ޝޫޓިންގ ކުރިން މެދުކަނޑާލާފައި ވަނީ ކަރީނާ ދެވަނަ ދަރިއަކަށް ބަލިވެ އިންކަން އިއުލާނު ކުރުމުން، އޭނާ ވިހާ ގަދަވަންދެން ކަމަށް ވެސް ރިޕޯޓުތަކުން ބުނެފައިވެއެވެ.