ފަސް ރަށެއްގެ ގޮނޑުދޮށް ހިމާޔަތް ކުރުމަށް އެމްޓީސީސީއާ ހަވާލުކޮށްފި
ގޮނޑުދޮށް ހިމާޔަތް ކުރުމުގެ ފަސް މަޝްރޫޢުއެއް ސަރުކާރުން މިއަދު އެމްޓީސީސީއާ ޙަވާލު ކޮށްފިއެވެ.
މިމަޝްރޫޢުތައް ޙަވާލުކުރުމަށް މިއަދު ޕްލޭނިންގ މިނިސްޓްރީގައި ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއިކުރެއްވީ ސީ.އީ.އޯ. އަލްފާޟިލް އާދަމް އާޒިމްއެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ އަލްފާޟިލާ ޒީނިޔާ އަޙްމަދު ޙަމީދެވެ.
އެމްޓީސީސީއާ ހަވާލުކުރި ފަސް މަޝްރޫއު:
- މ. މުލަށް ގޮނޑުދޮށް ހިމާޔަތް ކުރުމުގެ މަޝްރޫއު
މި މަޝްރޫއުއަކީ 66.17 މިލއަން ރުފިޔާގެ މަޝްރޫއެކެވެ. މަޝްރޫއުގެ ދަށުން 90.411 މީޓަރުގެ ޖިއޯ ބޭގް ރިވެޓްމަންޓް ޖެހުމުގެ މަސައްކަތް ހިމެނެ އެވެ. މި މަޝްރޫއު އަކީ 105 ދުވަހުގެ ތެރޭ ނިންމުމަށް ހަމަޖެހިފައިވާ މަޝްރޫއެކެވެ
- ވ. ރަކީދޫ ގޮނޑުދޮށް ހިމާޔަތް ކުރުމުގެ މަޝްރޫއު
މި މަޝްރޫއުގެ އަގަކީ 16.9 މިލިއަން ރުފިޔާއެވެ. މި މަޝްރޫއުގެ ދަށުން، 200 މީޓަރުގެ ސަރަޙައްދެއްގައި ބޭރުތޮށި ލުމާއި، 40 މީޓަރުގެ ގްރޮއިންސް ޖެހުން ހިމެނެއެވެ. 105 ދުވަސް ތެރޭ ނިންމުމަށް ހަމަޖެހިފައިވާ މަޝްރޫއުގެ މިވަގުތު ކުރިއަށްދަނީ އީއައިއޭގެ މަސައްކަތެވެ. އެ މަސައްކަތް ނިމޭނެ ކަމަށް ލަފާ ކުރެވެނީ އޭޕްރީލް މަހުގެ ނިޔަލަށެވެ.
- ރ. ފައިނު ގޮނޑުދޮށް ހިމާޔަތް ކުރުމުގެ މަޝްރޫއު
މި މަޝްރޫއުގެ އަގަކީ 96.8 މިލިއަން ރުފިޔާއެވެ. މި މަޝްރޫއުގެ ދަށުން، 250 މީޓަރުގެ ސަރަހައްދެއްގައި ޖިއޯބޭގް ރިވެޓްމަންޓް ޖެހުން ހިމެނެއެވެ. މަސައްކަތް ނިންމަން ހަމަޖެހިފައި ވަނީ 180 ދުވަސްތެރޭގައެވެ.
- ބ. ތުޅާދޫ ގޮނޑުދޮށް ހިމާޔަތް ކުރުމުގެ މަޝްރޫއު
މި މަޝްރޫއުގެ އަގަކީ 13.10 މިލިއަން ރުފިޔާއެވެ. މި މަޝްރޫއުގެ ދަށުން، 280 މީޓަރުގެ ސަރަޙައްދެއްގައި ޖިއޯބޭގް ރިވެޓްމަންޓް ޖެހުން ހިމެނެއެވެ. މަސައްކަތް ނިންމަން ހަމަޖެހިފައި ވަނީ 150 ދުވަސް ތެރޭގައެވެ.
- ރ. ރަސްމާދޫ ގޮނޑުދޮށް ހިމާޔަތް ކުރުމުގެ މަޝްރޫއު
މި މަސައްކަތުގެ އަގަކީ 68.11 މިލިއަން ރުފިޔާއެވެ. މަޝްރޫއުގެ ދަށުން 336 މީޓަރުގެ ގްރޮއިންސް ޖެހުމުގެ މަސައްކަތް ހިމެނެއެވެ. މަސައްކަތް ނިންމަން ހަމަޖެހިފައި ވަނީ 180 ދުވަސްތެރޭގައެވެ.
މި މަޝްރޫއުތަކުގައި ސޮއި ކުރުމަށް ބޭއްވި ރަސްމިއްޔާތުގައި އެ ދާއިރާތައް ތަމްސީލު ކުރައްވާ މަޖިލިސް މެމްބަރުން ވަނީ ބައިވެރިވެވަޑައިގެންފައެވެ.
