މުއިއްޒުގެ އިންތިހާބީ ހައްގަށް އަރައިގަތުމަށް ކުރަމުންދާ މަސައްކަތް އިދިކޮޅުން ކުށްވެރިކޮށްފި
ކުރިއަށް އޮތް ކައުންސިލް އިންތިޚާބުގައި އިދިކޮޅު ކޯލިޝަން ޓިކެޓްގައި ވާދަ ކުރައްވާ ޑރ. މުއިއްޒުގެ އިންތިޚާބީ ހައްގަށް އަރައިގަތުމަށް ސަރުކާރާއި، އެނޫން އިދާރާތަކުން ހިންގާ އަމަލުތައް އިދިކޮޅު ކޯލިޝަނުން ކުށްވެރި ކޮށްފިއެވެ.
މި ކަމާ ގުޅިގެން އިދިކޮޅުން ނެރުނު ބަޔާނުގައި ބުނީ މިއީ ކަނޑައެޅިގެން އިންތިޚާބަށް ނުފޫޒު ފޯރުވާ އެ ކޯލިޝަނާއި އެ ކޯލިޝަންގެ ކެނޑިޑޭޓް ޑރ. މުޢިއްޒުގެ އިންތިޚާބީ ޙައްޤުތަކަށް އަރައިގަތުމުގެ ގޮތުން ސަރުކާރާއި ރައްޔިތުންގެ މަޖިލީހުގައި އޮތް އެމްޑީޕީގެ މެޖޯރިޓީގެ ބޭނުން ކޮށްގެން، ރާވައިގެން ހިންގަމުން ގެންދާ ސިޔާސީ ކަންތައްތަކެއް ކަމުގައި ދެކޭ ކަމަށެވެ.
އިދިކޮޅުގެ ބަޔާނުގައި އިތުރަށް ބުނީ ޑރ. މުއިއްޒުގެ މައްސަލައެއް އޮތް ކަމަށް ބުނެ ވާހަކަ ދައްކަމުން ގެންދާތާ އެތައް އަހަރެއްވީ އިރު ވެސް އެމައްސަލަތައް ބަލައި، ހާޒިރުކޮށް ހަދާފައި ނުވާ އިރު، އިންތިޚާބަށް 2 ހަފްތާއަށް ވުރެ ގާތްވުމުން، މަޢުލޫމާތު ސާފުކުރަން ކަމަށް ބުނެ ނުވަތަ ހުށަހެޅިފައިވާ މައްސަލައަކާ ގުޅިގެން ކަމަށް ބުނެ އިރުއިރު ކޮޅާ ދައުލަތުގެ މުއައްސަސާ ތަކަށާއި އޭސީސީއަށް އެމަނިކުފާނު ހާޒިރު ކުރަމުން ގެންދާ ގެންދިއުން ދޭހަ ވަނީ ސަރުކާރަށާއި އެމްޑީޕީއަށް ރައްޔިތުންގެ ތާއީދު ގެއްލި މާލޭ ސިޓީ މޭޔަރުގެ ގޮނޑި އެމްޑީޕީއަށް ކާމިޔާބު ނުކުރެވޭނެ ކަން ކަށަވަރުވެ، ސަރުކާރާއި އެމްޑީޕީ ޕްރެޝަރަށް ވެއްޓިފައިވާ މިންވަރު ކަމަށެވެ.
އިދިކޮޅުން ވަނީ ކެންޑިޑޭޓުންނަށް ދައުލަތުގެ މުއައްސާތައް މެދުވެރިކޮށް އިންތިޚާބީ ޙައްޤަށް އަރައިގަނެ، ކުރަމުން ގެންދާ އެންޓި ކެމްޕެއިންގެ ޢަމަލުތައް މިހާރުން މިހާރަށް ހުއްޓައިލުމަށް ގޮވާލާފައެވެ.
