ގިނަ ދުވަސްފަހުން އެކުވެރިންނާ ދިމާވުމުން ނަށާލުމަކީ މައްސަލައެއް ނޫން: އަމްރު
ޕާޓީގައި އެކުގައި މަސައްކަތް ކުރާ ފަރާތްތައް ގިނަ ދުވަސްތަކަކަށްފަހު ދިމާވުމުން ، އެކީ ނަށާލުމަކީ މައްސަލައެއް ނޫން ކަމަށް ސްޓޭޓް ޓްރޭޑިންގ އޯގަނައިޒޭޝަންގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވެއްޖެއެވެ
އަމްރު މިހެން ވިދާޅުވެފައި ވަނީ، ރައްޔިތުން މަޖިލީހުގެ އެމްޑީޕީ ޕާލިމެންޓްރީ ގްރޫޕްގެ ލީޑަރު އަލީ އާޒިމާއި އެމްޑީޕީގެ ޕާލިމެންޓްރީ ގްރޫޕްގެ ޑެޕިއުޓީ ލީޑަރު، ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސޭން) އަދި މެންބަރު އިލްޔާސް ލަބީބްގެ އިތުރުން އަމްރު ނަށާ މަންޒަރު ފެންނަ ވީޑިއޯއެއް އަލީ އާޒިމް ޓްވިޓާގައި އާއްމު ކުރުމާއެކު ބައެއް ފަރާތްތަކުގެ ފާޑު ކިޔުން އެ މީހުންނަށް އަމާޒުވުމާ ގުޅިގެންނެވެ.
މިކަމާ ގުޅިގެން ކުރެއްވި ޓްވީޓެއްގައި އަމްރު ވިދާޅުވީ، ކެންޕެއިން ތަކުގައި ލަވަ ޖަހާ، ނެށުމަކީ އާއްމު ކަމެއް ކަމަށާއި ގިނަ ދުވަސްތަކަށްފަހު އެކުގައި މަސައްކަތް ކުރާ ރަޙްމަތްތެރިންނާ ދިމާވުމުން ނެށުމަކީ މައްސަލައެއް ކަަމަށް ދެކެ ވަޑައިނުގަންނަވާ ކަމަށެވެ.
"ގިނަ ދުވަސްތަކަކަށްފަހު ޕާޓީގައި އެކުގައި މަސައްކަތް ކުރާ ގާތް ރަޙްމަތްތެރިންނާއި ދިމާވެ، ކެންޕެއިންގެ ވާހަކަ ދައްކާލާ، ރައްވެހި ފަތިސް ގެ ލަވަޔަށް ނަށާލުމަކީ މައްސަލައެއް ނޫން.
އަބަދުވެސް ކެންޕެއިން ތަކުގައި ކެންޕެއިން ލަވަޖަހާ ބޮޑު ބެރަށް ނަށައި ހެދުމަކީ އާއްމުކަމެއް" އަމްރު ވިދާޅުވިއެވެ.
އާޒިމްގެ ޓްވީޓާއެކު ގިނަ ބައެއްގެ ފާޑު ކިޔުން އެ މީހުންނަށް ވަނީ އަމާޒުވެފައެވެ. މި ގޮތުން ބައެއް ފަރާތްތަކުން ބުނަމުން ދަނީ ރާއްޖެ މި ފަދަ ނާޒުކު ހާލެއްގައި އޮތްއިރު، އެ ފަދަ ނާޗަރަންގީ ކުޅުމަކީ ޤަބޫލު ކުރެވޭނެ ކަމެއް ނޫން ކަމަށެވެ. އަދި ސިކުނޑި ހަމަޖައްސާލަން ނަށާލުމަކީ މައްސަލައެއް ކަމުގައި ނުދެކޭ ކަމަށް ވެސް ބައެއް ފަރާތްތަކުން ބުނެފައި ވެއެވެ.
