މާފުށިން ފައިދިގުމަކުނުގެ ވިހަގަދަ ވައްތަރެއް ފެނިގެން ސަމާލުވާން އަންގައިފި
ފައިދިގު މަކުނުގެ ވަރަށް ވިހަ ގަދަ ވައްތަރެއް ކަމަށްވާ "ބްރައުން ވިޑޯ" ކ. މާފުށީގެ ބައެއް ގޭގެއިން ފެނުމުން އެއަށް ސަމާލުވާން ރަށު ކައުންސިލާއި ހެލްތު މިނިސްޓްރީން އަންގައިފި އެވެ.
މާފުށީ ކައުންސިލުން މިއަދު ކުރި އިއުލާނެއްގައި ބުނީ މާފުށީގެ އެކި ސަރަހައްދުތަކުންނާއި ގެދޮރުން ފެންނަމުންދާ މަކުނަކީ "ބްރައުން ވިޑޯ ސްޕައިޑާ" ކަން ހެލްތު މިިނިސްޓްރީގެ ވެކްޓަ ކޮންޓްރޯލް ޔުނިޓުން ކަށަަވަރުކޮށްދީފައިވާ ކަމަށެވެ. އެ ވައްތަރުގެ މަކުނު ނައްތައިލުމަށް ބޭނުން ކުރެވޭނީ ކޮން ކެމިކަލެއްތޯ ބަލަމުން ހެލްތުން ބަލަމުން އަންނަ ކަމަށް ވެސް އެ އިއުލާނުގައި ބުންޏެވެ.
މާފުށީ ކައުންސިލްގެ އިއުލާނުގައި ބުނީ ބްރައުން ވިޑޯ މަކުނު ނުވަތަ އޭގެ ބިސް ފެނިއްޖެ ނަމަ އަންދައިލުމަށް ވެކްޓާ ކޮންޓްރޯލް ޔުނިޓުން އަންގާފައިވާ ކަމަށެވެ.
ބްރައުން ވިޑޯ އަކީ ރާއްޖެއިން ކުރިން ފެނުނު ބްލެކް ވިޑޯއަށް ވުރެ ވަރުގަދަ ވިހައެއް ހުންނަ ބާވަތެކެވެ. އެކަމަކު ކަށިޖެހުމުގައި ދޫކުރާ ވިހައިގެ މިންވަރު މަދުވުމުން އެއީ، ބްލެކް ވިޑޯއަށް ވުރެ އިންސާނުންނަށް ނުރައްކާތެރިކަން ކުޑަ އެއްޗެކެވެ.
