މީހުން ޓްރެފިކްކޮށްގެން ހޯދާ މުދާ ދައުލަތަށް ނަގަން އިސްލާހެއް
މީހުން ޓްރެފިކް ކުރުން ހުއްޓުވުމުގެ ގޮތުން އެކަމުގެ ވިޔަފާރި ކޮށްގެން ހޯދާ މުދާ ދައުލަތަށް ނެގޭގޮތަށް މަޖިލީހުގެ ސަލަމާތީ ހިދުމަތްތަކާ ބެހޭ ކޮމެޓީން ފާސް ކޮށްފިއެވެ.
"ޔުނައިޓެޑް ނޭޝަންސް ކޮންވެންޝަން އެގެއިންސްޓް ޓްރާންސްނޭޝަނަލް އޯގަނައިޒް ކްރައިމް"ގެ ޕްރޮޓޮކޯލްއަކާ އެއްގޮތް ކުރުމުގެ ގޮތުން ވެރިކަން ކުރާ އެމްޑީޕީގެ ފަރާތުން ހިންނަވަރު ދާއިރާގެ މެމްބަރު ޖީހާން މަހުމޫދު އެ ބިލް ހުށަހެޅުއްވީ މިދިޔަ މަހު ކުރީކޮޅުގައެވެ.
އެ ބިލް ބަލައިގަނެ އިތުރަށް ދިރާސާ ކުރަން މަޖިލީހުގެ ސަލާމަތީ ހިދުމަތްތަކާބެހޭ ކޮމެޓީއަށް އޮތީ ފޮނުވައިފައެވެ. އެ ބިލުގައި ބުނެފައި ވަނީ ކޮމެޓީން ބިލް ދިރާސާކޮށް މީހުން ޓްރެފިކް ކުރުމުގެ ގާނޫނުގައި ބަޔާންކުރާ ކުށެއް ކުރުމަށް ބޭނުން ކުރި އަދި ކުށުގެ އަމަލުން ހޯދާފައިވާ މުދަލާއި ފައިސާ ދައުލަތަށް ނަގަން ހުށަހަޅާއިރު އެކަން ކުރަން ވާނީ ޖިނާއީ ގާނޫނުގެ އިޖުރާތުގައި ބުނާ އުސޫލުތަކާ އެއްގޮތަަށް ކަމަށެވެ.
މީހުން ޓްރެފިކްކުރުން ހުއްޓުވުމާ ބެހޭގޮތުން ނެޝަނަލް އެންޓި-ހިއުމަން ޓްރެފިކިން ސްޓިއަރިން ކޮމިޓީން އެކުލަވާލި ނެޝަނަލް އެކްޝަން ޕްލޭން ވަޒީރުންގެ މަޖިލީހުން ފާސްކޮށްފައި ވަނީ މިދިޔަ އަހަރުގެ ތެރޭގައެވެ.
ސްޓިއަރިން ކޮމިޓީން، ރާއްޖެ އާއި ރާއްޖެއިން ބޭރުގެ ކަމާބެހޭ ފަރާތްތަކާ މަޝްވަރާކޮށްގެން އެކުލަވައިލާފައިވާ އެކްޝަން ޕްލޭންގެ މައިގަނޑު މަގްސަދަކީ، ދިވެހިރާއްޖޭގައި މީހުން ޓްރެފިކްކުރުން ހުއްޓުވުމަށް ކުރާ މަސައްކަތުގެ ދުވެލި އަވަސް ކުރުމެވެ.
