ކޮވިޑަށް ފައްސި މީހުން އަމިއްލައަށް ވޯޓު ލާ ގޮތަށް ބަދަލުކޮށްފި
ކުރިއަށް އޮތް ލޯކަލް ކައުންސިލް އިންތިހާބުގައި ވޯޓުލާ ދުވަހު ކޮވިޑް-19 އަށް ފައްސި މީހުންނާއި ކަރަންޓީނުގައި ތިބޭ މީހުން ވޯޓުލާ އިިރު މީހެއްގެ އެހީތެރިކަން ހޯދޭގޮތަށް އޮތް އުސޫލު ބަދަލު ކޮށްފިއެވެ.
އިލެކްޝަންސް ކޮމިޝަން ، އީސީގެ ރައީސް އަހުމަދު ޝަރީފް ވިދާޅުވީ ފައްސި ވެފައިވާ ފަރާތްތަކަށް އެހީތެރިއެއްގެ އެހީގައި ވޯޓު ލެވޭ ގޮތަށް ހެދުމަކީ އީސީއަށް ގާނޫނުން ލިބިދޭ ބާރެއް ނޫން ކަމަށެވެ. އަދި ވޯޓަކީ ސިއްރު އެއްޗެއްކަމަށް ގާނޫނުގައި ކަނޑައަޅައިފައި އޮންނާތީވެ، ބައެއްގެ ވޯޓުގެ ސިއްރުކަން ގެއްލޭ ގޮތަށް އަމަލު ކުރުމަށް މަޖުބޫރު ކުރުމަކީ، އީސީއަށް ލިބިގެންވާ ބާރެއް ނޫން ކަމަށް ވެސް ޝަރީފް ވިދާޅުވިއެވެ.
ޝަރީފް ވިދާޅުވީ ފައްސި މީހުން ވެސް ރަނގަޅަށް އަތް ސެނެޓައިޒް ކުރުމަށް ފަހު ވޯޓު ކަރުދާހުގައި އަތްލުމުން ނުރައްކަލެއް ނެތްކަމަށް އެޗްޕީއޭގެ ޓެކްނިކަލް ޓީމުން ލަފާ ދީފައިވާ ކަމަށާއި އެހެންކަމުން އެމީހުން ވެސް ވޯޓު ލާ ގަޑީގައި އައިސް ވޯޓު ލެވޭނެ ކަމަށެވެ.
ވޯޓުލުމުގައި އެހީތެރިކަން ހޯދޭނެ މީހުންގެ ގޮތުގައި ހަތަރު ބައެއް ކަނޑައަޅައިފައިވެއެވެ. އޭގެ ތެރޭގައި ކޮވިޑް-19 އަށް ފައްސިި މީހުންނާއި ކަރަންޓީންގައި ތިބޭ މީހުން ހިމެނެއެވެ.
ވޯޓުލުން ކުރިޔަށް ގެންދިޔުމަށް ހަމަޖައްސާފައި ވަނީ އަންނަ ހޮނިހިރު ހެނދުނު 7އިން ހަވީރު 5 ޖަހަންދެނެވެ. އަދި ވޯޓު ނެގުން ބަންދުވާތާ 30 މިނެޓް ފަހުން ވޯޓު ގުނަން ފަށާނެއެވެ.
Ads by STO
