މާލޭގެ ބައެއް ބިންތަކަކީ ޒުވާނުންނަށް އާމްދަނީ ހޯދޭނެ ތަންތަން ކަމުގައި ހަދާނަން: މުޢިއްޒު
މާލޭގެ ބިންތައް ބޭނުން ކުރާ ގޮތް ބައްޓަން ކުރެވި ، ރަނގަޅު ނޫން ގޮތުގައި ބޭނުން ކުރެވޭ ބިންތަކުން ޒުވާނުންނަށް އާމްދަނީ ހޯދޭނެ ގޮތްތައް ފަހި ކުރައްވާނެ ކަމަށް ޑރ.މުޙައްމަދު މުޢިއްޒު ވިދާޅުވެއްޖެއެވެ.
މާލޭގެ މޭޔަރުކަމަށް ވާދަކުރައްވާ ކުރީގެ ހައުސިން މިނިސްޓަރ މުޙައްމަދު މުޢިއްޒު މިހެން ވިދާޅުވީ ރޭ ސަންގު ޓީވީން ދެއްކި ޚާއްޞަ ޕްރޮގްރާމެއްގައެވެ.
އެމަނިކުފާނު ވިދާޅުވީ ވިދާޅުވީ ވަޒީފާގެ ފުރުސަތުތައް އުފެއްދުމަކީ ސިޓީ ކައުންސިލަށް ކުރެވިދާނެ ކަމެއްތޯ ބައެއް މީހުން ސުވާލު އުފައްދަފާނެ ކަމަށާއި އެހެން ނަމަވެސް އެއީ ކައުންސިލްގެ މެންޑޭޓްގެ ތެރޭގައި އޮތް ކަމެއް ކަމަށެވެ، އަދި ކުރީން ކަމެއް ނުކޮށް އޮތުމަކީ އެކަން ނުކުރެވޭނެ ސަބަބެއް ނޫންކަން ފާހަގަ ކުރައްވައި މުއިއްޒު ވިދާޅުވީ "ފުދުންތެރި ރައްޔިތެއް"ގެ އަމާޒު ހާސިލް ކުރެއްވުމަށް މަސައްކަތް ކުރައްވާނެ ކަމަށެވެ.
"މާލޭގެ ބައެއް ބިންތައް އެބަހުރި ރަނގަޅު ނޫން ގޮތުގައި ބޭނުން ކުރާ ، އޭގެ ބައެއް ތަންތަން ކުދިކުދި ވިޔަފާރިތައް ފެށޭ ތަންތަނަށް ބަދަލު ގެނެވިދާނެ ، އެ ފަދަ (ތަންތަނަކީ) މަޝްރޫޢުތަކަށް ، ސަރުކާރާ މަޝްވަރާ ކުރެވިގެން ސިޓީ ކައުންސިލްގެ އިސް ނެގުމާއި ބައިވެރިވުމާއެކު (ހިންގާ ތަނަކަށް) ބަދަލު ކުރެވިދާނެ ، މިއީ ކުރެވޭނެ ކަންކަން" މުޢިއްޒު ވިދާޅުވިއެވެ.
އޭގެ އިތުރުން ސިޓީ ކައުންސިލްގައި ވެސް ބިދޭސީން އަދާ ކުރާ ގިނަ ވަޒީފާތަކެއް އެބަހުރި ކަމަށާއި އެ މަނިކުފާނުގެ މޭޔަރު ކަމެއްގައި ސިޓީ ކައުންސިލުން ބިދޭސީން މަދުކޮށް ދިވެހީންނަށް ވަޒީފާގެ ފުރުސަތުތައް ހޯއްދަވައި ދެއްވާނެ ކަމަށް ފާހަގަ ކުރައްވަމުން ޚާއްޞައެހީއަށް ބޭނުންވާ މީހުންނަށް ވެސް އެ ފުރުސަތު ހޯއްދަވައި ދެއްވާނެ ކަމަށް މުޢިއްޒު ވިދާޅުވިއެވެ.
"ސިޓީ ކައުންސިލްގައި ބައިވަރު ވަޒީފާ އެބަހުރި ، ޚާއްޞަ ގޮތެއްގައި ބިދޭސީންނަށް ދީފައި އެބަހުރި ވަރަށް ގިނަ ވަޒީފާ ، މި ވަޒީފާތަކުގައި ތިބޭ ބިދޭސީންނަށް މުސާރައާއި ކެއުމާއި ނިދުމާ ހުރިހާ އެއްޗެއް ދީގެން ނިމޭއިރުގައި އެތަނުގައި އުޅޭ ދިވެހި މުވައްޒަފުންނަށް ވުރެ ބޮޑު އެއްޗެއް ދޭން އެބަޖެހޭ ، އެއަށް ވުރެ މާ ރަނގަޅުވާނެ ކަމަށް ޤަބޫލު ކުރަނީ ބިދޭސީން މަދު ކުރަމުން މަދު ކުރަމުން ގޮސް ، ހުސްވާ ވަޒީފާތަކަށް ދިވެހީން ހަމަޖައްސަން ، އެއީ އިރާދަކުރެއްވިއްޔާ އަޅުގަނޑު ކުރާނެ ކަމެއް" މުޢިއްޒު ވިދާޅުވިއެވެ.
ތަސައްވުރު ވަރަށް ރަގަޅު. މުޖުތަމަޢު އެބަފެނޭ. ޢެބައެނގޭ. ކަންކުރަންވީ މަގު އެގޭ.