ޖެކްލިން ކޮވިޑަށް ނައްސިކަން ޤަބޫލުކުރީ ދެ ފަހަރަށް ޓެސްޓު ކުރުމަށްފަހު
މި ދުވަސްވަރަކީ އަނެއްކާ ވެސް އިންޑިއާގައި ހަލުވިކަމާއެކު ކޮވިޑް-19 ފެތުރެމުން އަންނަ ދުވަސްވަރެކެވެ. އަދި ގިނަ އަދަދެއްގެ ބޮލީވުޑް ތަރިން ވެސް ވަނީ މި ބައްޔަށް ފައްސި ވެފައެވެ.
ފައްސިވީ ތަރިންގެ ތެރޭގައި އާމިރް ޚާން، ކާރްތިކް އާރްޔަން، ރަންބީރް ކަޕޫރް، އާލިއާ ބަޓް، ކެޓްރީނާ ކެއިފް ގެ އިތުރުން އަކްޝޭ ކުމާރް ވެސް ހިމެނެއެވެ.
އަކްޝޭ ކުމާރް ކޮވިޑަށް ފައްސިވެ، ހޮސްޕިޓަލްގައި އެޑްމިޓު ވެސް ކުރިއެވެ. ކޮވިޑަށް ފައްސިވީއިރު އޭނާ ދިޔައީ "ރާމް ސޭތޫ" ނަމަކަށް ކިޔައި ފިލްމެއްގެ މަސައްކަތް ވެސް ކުރަމުންނެވެ.
އަކްޝޭ ކޮވިޑަށް ފައްސިވުމުން ގިނަ މީހުންގެ ފަރާތުން ހެޔޮ ދުޢާ ލިބުނު ކަމުގައިވިޔަސް، އޭނާއާއެކު އެ ފިލްމުގައި މަސައްކަތްކުރި ބައެއް ފަރާތްތަކުން ވަނީ އެކަމާ ވަރަށް ބިރު ވެސް ގަނެފައެވެ. އޭގެ ތެރެއިން އެކަކީ އެ ފިލްމުގެ ލީޑް ރޯލުން ފެންނަ ޖެކްލިން ފަރނަންޑެޒްއެވެ.
ރިޕޯޓުތަކުން ބުނާ ގޮތުގައި ޖެކްލިން ވަނީ ކޮވިޑް-19އަށް ނައްސިކަން ފުރިހަމައަށް ޔަގީން ކުރުމަށްޓަކައި ދެ ފަހަރަށް ޓެސްޓު ކޮށްފައެވެ. ދެ ފަހަރަށް ވެސް ނަތީޖާ އައީ ނައްސި ކަމަށެވެ.
އަކްޝޭ ކޮވިޑަށް ފައްސިވުމާ ގުޅިގެން، އެ ފިލްމުގެ 45 މީހަކު ވަނީ ކޮވިޑަށް ޓެސްޓުކޮށް، ހޯމް ކަރަންޓީނަށް ގޮސްފައެވެ. އޭގެތެރޭގައި ޖެކްލިން އާއި ނުޝްރަތު ބަރޫޝާ ވެސް ހިމެނެއެވެ.
