ހިޔާ ފްލެޓްގެ އަގުބޮޑު ކުރުމަކީ ރައްޔިތުންނަށް ދެވުނު އިތުރު ހިތްދަތިކަމެއް: މުއިއްޒު
ކުރީގެ ރައީސް ޔާމީންގެ ސަރުކާރުގައި ހުޅުމާލެ ފޭސް 2 ގައި އިމާރާތް ކޮށްފައިވާ ހިޔާ ފްލެޓުތަކުގައި އަގަށް ގެނައި ބަދަލަށް ކުރީގެ ހައުސިން މިނިސްޓަރު ޑރ.މުޙައްމަދު މުޢިއްޒު ފާޑު ވިދާޅުވެއްޖެއެވެ.
މާލޭގެ މޭޔަރުކަމަށް ވާދަ ކުރައްވާ ކުރީގެ ހައުސިން މިނިސްޓަރ މުޙައްމަދު މުޢިއްޒު ކުރެއްވި ޓްވީޓެއްގައި ވިދާޅުވީ ހިޔާ ފްލެޓްތަކުގެ ކުލީގެ އަގު ކުރިން ކަނޑައަޅަައިފައިވާ ވަރަށް ވުރެ ބޮޑުކޮށް މި ސަރުކާރުން ދިނުމަށް ނިންމި ނިންމުމަކީ ރައްޔިތުންނަށް ދެވުނު އިތުރު ހިތްދަތި ކަމެއް ކަމަށެވެ.
"ހިޔާ މަޝްރޫޢުގެ ފްލެޓް ތަކަށް މަހަކު ދައްކަންޖެހޭ ވަރަކީ 5،600 އަށްވުރެ ބޮޑު އަދަދެއް ކަމަށް ކަނޑައެޅުމަކީ ރައްޔިތުންނަށް ދެވުނު އިތުރު ހިތްދަތިކަމެއް. ދޮރާ، ޓައިލްސްއާ އެއްކޮށް، 5،600 އަށް ދެވޭނެ. އަދި 25 އަރަށް ބަހާލާ ނަމަ، 3،800 އަށް ދެވޭނެ." ހިޔާ މަޝްރޫއުގެ އެން މެބޮޑު ހިއްސާއެއް އަދާ ކުރެއްވި މުޢިއްޒު ވިދާޅުވިއެވެ.
"ހިޔާ" ފްލެޓްތައް ޑައުންޕޭމަންޓާ ނުލައި މަހު ކުއްޔަކީ 7،500 ރުފިޔާ ކަމަށް ސަރުކާރުން އިއްޔެ ވަނީ ކަނޑައަޅައިފައެވެ. މިއީ ރައީސް ޔާމީންގެ ވެރިިކަމުގައި ފްލެޓުތައް ދޭން ނިންމި އަގަށް ވުރެ ބޮޑު އަގެކެވެ.
ހިޔާ ފްލެޓަށް ދައްކަން ޖެހޭ އެންމެ ބޮޑު އަގަކީ 7،500ރ. ކަމަށް ސަރުކާރުން ކަނޑައެޅި ނަމަވެސް އެއީ އެ ފްލެޓްގެ އަސްލު އަގާ ބަލާފައި ވަރަށް ކުޑަ އަގެއް ކަމަށާއި މި މަޝްރޫއުގެ އުނދަގޫ އެޗްޑީސީއަށް ވަރަށް ބޮޑު ވާނެ ކަމަށް ހައުސިން މިނިސްޓަރު އަސްލަމް އިއްޔެ ވިދާޅުވިއެވެ. އޭނާ ވިދާޅުވި ގޮތުގައި، ހިޔާ ފްލެޓްތައް އިމާރާތް ކުރުމުގެ އަގާއި ލޯނުގެ ފައިނޭންޝަލް ކޮސްޓާއެކު ފްލެޓަކަށް އަސްލު ޖެހޭ އަގަކީ 11،000ރ. އެވެ.
