61،000 ރުފިޔާއަށްވުރެ ބޮޑު އާމްދަނީ ލިބޭ މީހުންނަށް ސަރުކާރުގެ ބޯހިޔާވަހިކަން ނުލިބޭނެ
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ބޯހިޔާވަހިކަމަށް އެދި ފޯމު ހުށަހެޅޭނެ ޝަރުތުތައް ހާމަ ކޮށްފިއެވެ.
ހައުސިން އެންޑް އިންފްރާސްޓްރަކްޗާ މިނިސްޓްރީން ވިދާޅުވީ ބޯހިޔާވަހިކަމަށް އެދޭ ފަރާތްތަކަކީ އުމުރުން 18 އަހަރު ފުރިފައިވާ ދިވެހި ރައްޔިތެއް ކަމަށް ވާން ޖެހޭނެ ކަމަށެވެ. އަދި މި ފަރާތްތަކުގެ ޝަރުތު ހަމަވުމުގައި އެ މީހަކީ މާލޭގެ ރަށްވެއްސަކަށް ވާންޖެހޭނެ ކަމަށާއި މާލޭގެ ރަށްވެއްސެއް ކަމަށް ބަލާނީ މާލޭގެ ރެޖިސްޓްރީގައި އޮންނަތާ 15 އަހަރު ވެފައިވާ މީހުންނަށް ކަމަށް ވެސް މިނިސްޓްރީން ވިދާޅުވިއެވެ.
އަދި މަހަކަށް ލިބޭ ޖުމްލަ އާމްދަނީ 61،000 ރުފިޔާއަށް ވުރެ އިތުރުނަމަ އެމީހަކަށް ބޯހިޔާވަހިކަމަށް އެދި ފޯމު ހުށަހެޅުމަށް ޝަރުތު ހަމައެއް ނުވާނެއެވެ.
މީގެ އިތުރުން އެޕްލިކޭޝަން ހުށަހެޅުމުގެ ކުރިން މާލެ ސިޓީ އިން، ޕްރައިވެޓް ރިއަލްއެސްޓޭޓް މާކެޓުން 600 އަކަ ފޫޓަށް ވުރެ ބޮޑު ހައުސިން ޔުނިޓެއް ނުވަތަ ބިމެއް ގަނެ ނުވަތަ ގަތުމަށް، އެއްބަސްވުމެއްގައި ސޮއިކޮށް ފައިސާ ދައްކަން ފަށައިފައި އޮވެގެން ނުވާނެ ކަމަށް ވެސް ވަނީ ކަނޑައަޅާފައެވެ. މި އެޕްލިކޭޝަންގެ ދަށުން އެވޯޑު ކުރެވޭ ހައުސިން ޔުނިޓު ލިބޭ ފަރާތަކުން މާލެ ސިޓީގައި ޕްރައިވެޓް ރިއަލް އެސްޓޭޓް ހައުސިން ޑިވެލޮޕްމަންޓަކަށް އެއްބަސްވުމެއްގައި ސޮއިކޮށް ފައިސާ ދައްކަން ފަށާނަމަ، އެ މަޝްރޫއުގެ ދަށުން ލިބިފައިވާ ބޯހިޔާވަހިކަން ދައުލަތަށް އަނބުރާ ނެގޭނެ ކަމަށް ވެސް މިނިސްޓްރީން ވަނީ ވިދާޅުވެފައެވެ.
މައި އެޕްލިކަންޓް ގޮތުގައި ހިމެނޭ ފަރާތަކީ މިދިޔަ ތިން އަހަރު ތެރޭގައި، މާލެ ސިޓީގައި ދިރިއުޅުމަށް ހޯދިފައިވާ އެއްވެސް ތަނެއް ވިއްކާފައިވާ ފަރާތަކަށް ވެގެން ނުވާނެ ކަމަށާއި އެޕްލިކޭޝަން ހުށަހަޅާ ތާރީހުގައި މައި އެޕްލިކަންޓް އަދި ކޯ-އެޕްލިކަންޓްއަކީ ސަރުކާރުގެ ބޯހިޔާވަހިކަމުގެ އެއްވެސް މަޝްރޫއަކުން މީގެ ކުރިން ބޯހިޔާވަހިކަމެއް ލިބިފައިވާ ފަރާތަކަށް ވެގެން ނުވާނެ ކަމަށް ވެސް ހައުސިން މިނިސްޓްރީން ވިދާޅުވެފައި ވެއެވެ.
Ads by STO
