ވިލުފުށީގައި ބަހައްޓާ ދެ ފޮށީގެ އޮފިޝަލުން ކަރަންޓީނުވާން ޖެހުމުން، މާލެއިން އޮފިޝަލުން ގެންދަނީ
ތ. ވިލުފުށީގައި ބަހައްޓާ ދެ ވޯޓު ފޮށީގެ ގިނަ އޮފިޝަލުންތަކެއް ކަރަންޓީނުވާން ޖެހުމުން، މާލެއިން އެ ރަށަށް އޮފިޝަލުން ގެންދާގޮތަށް ހަމަޖައްސައިފިއެވެ.
އިލެކްޝަންސް ކޮމިޝަންގެ ރައީސް އަޙުމަދު ޝަރީފް މިރޭ ކުރެއްވި ޓްވީޓެއްގައި ވިދާޅުވީ ވިލުފުށީގައި ބަހައްޓާ ދެ ފޮށީގެ ގިނަ އޮފިޝަލުންތަކެއް ކަރަންޓީނުވެ، އިތުރު އޮފިޝަލުން އެ ރަށުން ލިބިފައި ނުވުމުގެ ސަބަބުން މާލެއިން އެ ރަށަށް އޮފިޝަލުން ގެންދާ ގޮތަށް ހަމަޖައްސާފައިވާ ކަމަށެވެ.
"ތ. ވިލުފުށީގައި ބަހައްޓާ ދެ ފޮށީގެ ގިނަ އޮފިޝަލުން ކަރަންޓީނުވެ އިތުރު އޮފިޝަލުން ރަށުން ނުލިބިގެން، މާލެއިން އޮފިޝަލުން ގެންދާ ގޮތަށް ހަމަޖައްސައިފިން. ވިލުފުށީގައި ވޯޓުލުން ފެށޭނީ އޮފިޝަލުންނަށް އެ ރަށަށް ދެވުމުން" ޝަރީފް ވިދާޅުވިއެވެ.
މި އަހަރުގެ ލޯކަލް ކައުންސިލު އިންތިހާބާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީއަށް މަސައްކަތް ކުރާ ކެންޑިޑޭޓުންނަށް ވޯޓުލުމަށް ހަމަޖެހިފައިވާ ދުވަހަކީ މާދަމާއެވެ. އެގޮތުން އިންތިޚާބުގައި ވޯޓް ދޭން ފަށާ ގަޑިއަކީ ހެނދުނު 7 ޖަހާއިރު ކަމަށާއި ކޮވިޑް19 އާ ގުޅިގެން ކަރަންޓީނު ކޮށްފައި ނުވަތަ އެކަހެރި ކޮށްފައި ތިބި މީހުންނަށް މާދަމާ އޮންނަ އިންތިހާބުގައި ވޯޓުލާން އެއް ގަޑިިއިރު ދޭނެ ކަމަށް އިލެކްޝަންސް ކޮމިޝަނުން ވަނީ ނިންމަވައިފައެވެ.
ކަރަންޓީނުގައި ތިބޭ މީހުން ވޯޓުލާން ހާއްސަކޮށްފައިވާ ގަޑިއަކީ، މާދަމާ ހަވީރު 5:00 އިން އިރުއޮއްސި 6:00 އަކަށް ކަމަށް ވެސް އިލެކްޝަންސުން ވިދާޅުވެފައިވެއެވެ.
Ads by STO
