3000އާ ގާތްކުރާ އަދަދެއްގެ މީހުން 8:20ގެ ނިޔަލަށް ވޯޓުލައިފި
މިހާރު ފެށިގެން ކުރިއަށްދާ ލޯކަލް ކައުންސިލު އިންތިހާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިހާބުގައި މިހާތަނަށް 2718 މީހުން ވޯޓު ލައިފިކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އެ ކޮމިޝަންގެ ރައީސް އަޙުމަދު ޝަރީފު ވިދާޅުވީ، އިންތިހާބަށް ވޯޓުލުން މިއަދު ހެނދުނު 7:00ގައި ފެށިފައިވާއިރު 8:20އާ ހަމައަށް 2718 މީހުން ވޯޓުލައިފި ކަމަށެވެ.
މިހާތަނަށް ވޯޓުލީ މީހުންގެ ތެރޭގައި ހިމެނެނީ 1962 ފިރިހެނުންނާއި 756 އަންހެނުންނެވެ.
މި އިންތިހާބުގައި ވޯޓުލުމުގެ ޙައްޤު ލިބިފައިވަނީ 273128 މީހަކަށެވެ.
ވޯޓުލާން މިފަހަރު 713 ފޮށި ބަހައްޓާފައި ވާއިރު، ވޯޓުލުން މިވަގުތު ފެށިފައި ވަނީ 518 ފޮއްޓެއްގައެވެ.
އީސީގެ ރައީސް ޝަރީފް ވިދާޅުވީ، ތ. ވިލުފުށީގެ ދެ ފޮށީގެ ވޯޓުލުން މިހާރު ކުރިއަށްދާ ކަމަށެވެ. ވިލުފުއްޓަކީ މޮނީޓަރިންގަށް ލާފައިވާ ރަށެއް ކަމަށްވާތީ، އެ ރަށުގައި ވޯޓުލާން ފަށާފައިވަނީ ލަހުންނެވެ.
