ވޯޓު ކަރުދާހުގެ ފޮޓޯ އާންމު ކުރާ ކަމުގެ މައްސަލަތަކެއް!
މިހާރު ކުރިއަށްދާ ލޯކަލް ކައުންސިލް އިންތިޚާބުގެ ވޯޓު ކަރުދާސްތަކުގެ ފޮޓޯތައް ބައެއް ފަރާތްތަކުން މީސްމީޑީއާގައި އާންމު ކުރަމުންދާ މައްސަލަތަކެއް ފެންމަތި ވެފައިވާ ކަމުގައި އިލެކްޝަންސް ކޮމިޝަނުން ވިދާޅުވެއްޖެއެވެ.
އީސީގެ ރައީސް އަހްމަދު ޝަރީފް "ދެން"އާ ވާހަކަ ދައްކަވަމުން ވިދާޅުވީ ޓްވީޓާއިން ވޯޓު ކަރުދާހުގެ ފޮޓޯތައް އޭނާއަށް ވެސް ފެންނަމުންދާ ކަމަށެވެ. އަދި އެކަން އެހެން ހިނގާތީ ވޯޓު ފޮށިތަކުގެ ކައިރީގައި ތިއްބަވާ ވެރިންނަށް އިތުރަށް އެކަމަށް ސަމާލުކަމެއް ދިނުމަށް އަންގާފައި ވާނެ ކަމަށް ވެސް ޝަރީފް ވިދާޅުވިއެވެ.
ޝަރީފް އިތުރަށް ވިދާޅުވީ ވޯޓުލާން މީހުން ވައްދާއިރު އީސީއިން އެއްވެސް ގޮތަކަށް އެމީހާގެ އަތުގައި ހުންނަ އެއްޗެހި ޗެކް ނުކުރާ ކަމަށެވެ އެހެންކަމުން ޖީބަށް ފޯނު ލައިގެން ވޯޓުލާން ވަނުމަށް ފަހު ފޮޓޯ ނަގައި އާންމު ކުރުމަކީ ހިނގައިފާނެ ކަމެއް ކަމުގައި ޝަރީފް ވިދާޅުވިއެވެ. ނަމަވެސް މިކަމާ ގުޅިގެން ރަސްމީ ގޮތެއްގައި އެއްވެސް މައްސަލައެއް އަދި ޖައްސާފައި ނުވާ ކަމުގައި ޝަރީފް ވިދާޅުވިއެވެ.
"އެއީ ކަނޑައެޅިގެން ޤާނޫނުގައި މަނާ ކަމެއް. އެހެންކަމުން އަޅުގަނޑުމެން ވޯޓުފޮށި ތަކުގެ ވެރިންނަށް އަންގާފައި އޮންނާނީ އެފަދަ ކަންކަމަށް ބޮޑަށް ފާރަވެރި ވުމަށް"
ޝަރީފް
މީސްމީޑިއާގައި ބައެއް ފަރާތްތަކުން ވޯޓު ކަރުދާހުގެ ފޮޓޯ އާންމު ކޮށްފައިވާއިރު ބޭ އަދަބީ ބަސްތައް ވޯޓު ކަރުދާހުގައި ލިޔެފައިވާ ފޮޓޯތައް ވެސް މީސްމީޑިއާގައި އެބަ ދައުރުވެއެވެ.
