ކަރަންޓީނުގައި ހުރިމީހަކު ވޯޓު ކަރުދާހުގައި އަމިއްލައަށް ފާހަގަ ޖެހުމުގެ ހުއްދަ ނުދިން މައްސަލައެއް
ގދ.ތިނަދޫގައި ކަރަންޓީނުގައި ހުރި މީހަކަށް، ވޯޓު ކަރުދާހުގައި އަމިއްލައަށް ފާހަގަ ޖެހުމުގެ ހުއްދަ ނުދިން މައްސަލައެއް ފެންމަތިވެއްޖެއެވެ.
ތިނަދޫގައި ކަރަންޓީނުގައި ހުރި މެދު އުމުރުގެ ފިރިހެނަކު "ދެން" އަށް މައުލޫމާތު ދެމުން ބުނީ، އޭނާ ވޯޓުލާން ދިޔުމުން ވޯޓުލާ ފޮށީގެ ވެރިން ވޯޓު ކަރުދާހުގައި ފާހަގަ ޖެހުމުގެ ޙައްޤު އޭނާގެ ކިބައިން ނިގުޅައިގަތް ކަމަށެވެ.
"ވޯޓުލާން ދިޔައިމަ ބުނީ ތިމަންނާމެންނަށޯ ކަރުދާސް ކޮޅުގައި ފާހަގަ ޖެހޭނީ، ފާހަގަ ޖަހާކަށް އަމިއްލައަކަށް ކަރުދާހެއް ދުލެއް ނުކުރެވޭނެޔޯ" އެ މީހާ ދެންއަށް މައުލޫމާތު ދެމުން ކިޔައިދިނެވެ.
އޭނާ އިތުރަށް ބުނީ ވަރަށް ވާހަކަ ދައްކައިގެން ވެސް ވޯޓު ކަރުދާހުގައި އަމިއްލައަށް ފާހަގަ ޖަހަން އޭނާއަށް ހުއްދަ ނުދިން ކަމަށާއި އެހެންކަމުން އޭނާ ބުނި ތަނެއްގައި ފާހަގަ ޖެހީ އެ ފޮށީގެ އިސްވެރިޔާ ކަމަށެވެ.
"ވޯޓު ސިއްރެއް ނުވެއްނު އެހެންވީމަ. އިލެކްޝަންސް ކޮމިޝަންގެ ބިއުރޯއަށް ވެސް ގުޅާފައި އެ މައްސަލަ ޖައްސައިފިން، އެ މީހުން ވެސް ބުނީ އަމިއްލައަށް ގަލަން ގެންދިޔައިމަ ފާހަގަ ޖެހޭނެ ކަމަށް. އެކަމަކު މިތަނުގައި ތިބި މީހުން އެ ހުއްދައެއް ނުދިން" އޭނާ އިތުރަށް ކިޔައިދިނެވެ.
މި މައްސަލަ ކުރިމަތިވެފައި މިވަނީ ތިނަދޫ ސްކޫލްގެ ކިޔު1.1 ނަންބަރު ފޮށީގައި ކަމަށް މައުލޫމާތު ލިބެއެވެ.
