523 ފޮށި ބަންދުކޮށް 53 ފޮއްޓެއްގެ ވޯޓު ގުނަން ފަށައިފި
މިއަދު ކުރިޔަށްދާ ލޯކަލް ކައުންސިލްތަކާއި އަންހެނުންގެ ތަރައްގީ އަށް މަސައްކަތް ކުރާ ކޮމެޓީތަކުގެ އިންތިހާބުގެ 523 ފޮށި ބަންދުކޮށް 53 ފޮއްޓެއްގެ ވޯޓު މިހާރު ގުނަން ފަށައިފިއެވެ.
އިލެކްޝަންސް ކޮމިޝަނުގެ ރައީސް އަހްމަދު ޝަރީފް އެންމެ ފަހުން އާއްމުކުރި ތަފާސް ހިސާބުތައް ދައްކާ ގޮތުގައި މިއަދު އިރުއޮއްސި 18:50 އާ ހަމައަށް 178،280 މީހަކު ވަނީ ވޯޓުލައިފައެވެ. ވޯޓްލާފައި ވަނީ 90،134 ފިރިހެނުންނާއި 88،146 އަންހެނުންނެވެ.
މިހާތަނަށް ވޯޓު ނުލާމީހުންގެ ޢަދަދު 36.33 އިންސައްތައަށް އަރާކަމަށް އިލެކްޝަންސް ކޮމިޝަނުންގެ ތަފާސް ހިސާބުތަކުން ދައްކައެވެ. މި އިންތިހާބުގައި ބަހައްޓާފައި ވަނީ 713 ވޯޓު ފޮއްޓެކެވެ.
ގިނަ ވޯޓުފޮށިތައް މިހާތަނަށް ވަނީ ބަންދުކޮށްފައެވެ. އެންމެ ލަހުން ބަންދުކުރަން ނިންމާފައި ވަނީ ތ. ވިލުފުށީގައި ބަހައްޓާފައިހުރި ވޯޓުފޮށިތަކެވެ. ވިލިފުށީގައި ވޯޓުލުން ނިމޭނީ މިރޭ 21:50ގައިކަމަށް އިލެކްޝަންސް ކޮމިޝަނުން ހާމަ ކޮށްފައި ވެއެވެ.
