މާލޭ ސިޓީ ކައުންސިލްގެ މެޖޯރިޓީ ފުރަތަމަ ފަހަރަށް ޕީޕީއެމްއަށް
މިއަަދު ބޭއްވި ލޯކަލް ކައުންސިލް އިންތިޚާބުގައި މާލޭ ސިޓީ ކައުންސިލްގެ މެޖޯރިޓީ ގޮނޑިތައް ޕީޕީއެމްއިން ހޯދައިފައިވާ ކަމަށް އެ ޕާޓީން ހާމަކޮށްފިއެވެ.
މިއީ މާލޭ ކައުންސިލްގެ މެޖޯރިޓީ އެމްޑީޕީއަށް ލިބުނު ފުރަތަމަ ފަހަރެވެ. އަދި އެމްޑީޕީއަށް މާލޭ ސިޓީ ކައުންސިލްގެ މެޖޯރިޓީ ގެއްލުނު ފުރަތަމަ ފަހަރެވެ.
ޕީޕީއެމުން ބުނީ އެ ޕާޓީއަށް މިހާރު ކައުންސިލްގެ 12 ގޮނޑި ކަށަވަރު ވެފައިވާ ކަމަށެވެ. އޭގެ ތެރޭގައި މޭޔަރުކަމުގެ ގޮނޑި ކާމިޔާބު ކުރެއްވި ކުރީގެ ހައުސިންގ މިނިސްޓަރު މުހައްމަދު މުޢިއްޒު ވެސް ހިމެނެއެވެ.
ޕީޕީއެމް އިން ބުނާ ގޮތުގައި މިހާރު ގޮނޑި ކަށަވަރު ވެފައިވާ ކެނޑިޑޭޓުންނަކީ މާލޭ މޭޔަރު ކަމަށް ކުރިމަތި ލެއްވި މުހައްމަދު މުޢިއްޒާއި، ވިލިމާލޭ ދާއިރާއަށް ވާދަކުރެއްވި ނަހުލާ އަލީ އާއި ހުޅުމާލޭ ދާއިރާއަށް ވާދަކުރެއްވި އިބްރާހިމް ޝުޖާއު އާއި މާފަންނު މެދު ދާއިރާއަށް ވާދަކުރެއްވި އަހްމަދު ނަރީޝް އާއި މާފަންނު ހުޅަނގު ދާއިރާއަށް ކުރިމަތިލެއްވި އިބްރާހިމް އަބޫބަކުރާއި މާފަންނު ދެކުނު ދާއިރާއަށް ވާދަ ކުރެއްވި އަބްދުﷲ ނާސިރު އާއި މައްޗަންގޮޅި ދެކުނު ދާއިރާއަށް ވާދަކުރެއްވި އާއިޝަތު ނާޒިމާ އާއި މައްޗަންގޯޅި އުތުރު ދާއިރާއަށް ވާދަ ކުރެއްވި ސަޢީދާ ރަޝާދު އާއި ހެންވޭރު ދެކުނު ދާއިރާއަށް ވާދަކުރެއްވި ޝަމްނާޒް އަލީ އާއި ހެންވޭރު ހުޅަނގު ދާއިރާއަށް ވާދަކުރެއްވި އަހްމަދު އައިފާނުގެ އިތުރުން މެދު ހެންވޭރު ދާއިރާއަށް ވާދަ ކުރެއްވި އިބްރާހިމް މުހައްމަދެވެ.
