ލަވަކިޔުންތެރިޔާ ޒަލީފާއެކު ފުރަތަމަ ފަހަރަށް ތިނަދޫގެ ތިން ގޮނޑި ޕީޕީއެމްއަށް

މޯލްޑިވިއަން އައިޑަލުން ވިދާލި ލަވަކިޔުންތެރިޔާ މުހައްމަދު ޒަލީފާއެކު ގދ.ތިނަދޫގެ ކައުންސިލަށް ޕީޕީއެމްގެ ތިން މެންބަރުން އިންތިޚާބު ވެއްޖެއެވެ. '

Ads by MWSC

މިއީ ކައުންސިލް އިންތިޚާބު ބާއްވަން ފެށި ފަހުން 10 އަހަރުވީ ތާރީހުގައި ވެސް ޕީޕީއެމްއަށް ތިނަދޫގެ ގޮނޑިއެއް ލިބުނު ފުރަތަމަ ފަހަރެވެ.

މިހާރު ލިބިފައިވާ ވަގުތީ ނަތީޖާއިން ދައްކާ ގޮތުގައި ޕީޕީއެމްގެ އަހްމަދު ވަހީދު އާއި އައިޝަތު ލިއުޝާ އަދި މުހައްމަދު ޒަލީފުއަށް ވެސް ގޮނޑި ވަނީ ކަށަވަރު ވެފައެވެ. މިއީ ތިނަދޫގައި ޕީޕީއެމްއަށް ލިބިގެން ދިޔަ ތާރީހީ ކާމިޔާބެކެވެ.

އެރަށުން ކައުންސިލްގެ ގޮނޑިތައް ދެން ކާމިޔާބު ކޮށްފައި ވަނީ އެމްޑީޕީގެ ނަސްރުﷲ އަލީ އާއި ކައުންސިލްގެ އަންހެނުންނަށް ޚާއްސަ ގޮނޑިއަށް އެ ޕާޓީން ކުރިމަތިލެއްވި އައިމިނަތު ނަސީމާއެވެ. އަދި އެ ރަށުން ކައުންސިލްގެ އަންހެނުންނަށް ޚާއްސަ ގޮނޑި ކާމިޔާބު ކުރައްވާ ތިންވަނަ ކެނޑިޑޭޓް ޔަގީނެއް ނުވެއެވެ. ޕީޕީއެމްއިން އަންހެނުންނަށް ޚާއްސަ ގޮނޑިއަށް ދެން ކުރިމަތިލައިފައި ވަނީ ނިއުމާ ޙުސައިން އާއި އާމިނަތު އަބްދުﷲއެވެ.

ތިނަދޫ ރަށު ކައުންސިލްގެ ރައީސްކަން ކާމިޔާބު ކުރެއްވީ އެމްޑީޕީގެ ކެނޑިޑޭޓް ސައުދު އަލީއެވެ. އޭނާ އެގޮނޑި ކާމިޔާބު ކުރެއްވީ ޕީޕީއެމްގެ ކެނޑިޑޭޓް މުހައްމަދު ނަސީމާ ވާދަކޮށްގެންނެވެ.