ކުރެންދޫގެ މިސްރާބު ރަށްވެހި ފަތިހަކަށް
އިއްޔެ ކުރިއަށް ދިޔަ ލޯކަލް ކައުންސިލް އިންތިޚާބުގައި ޅ.ކުރެންދޫގެ ފަސް ގޮނޑި ވެސް ވެރިކަން ކުރާ މައި ޕާޓީ އެމްޑީޕީއިން ކާމިޔާބު ކޮށްފިއެވެ.
އެރަށުގެ ކައުންސިލްގެ ރައީސް އަކަށް ޕީޕީއެމްގެ ކެނޑިޑޭޓް އިސްމާއިލް މަދީހު އާއި ޖޭޕީގެ ކެނޑިޑޭޓް މުހައްމަދު އަބްދުﷲއާ ވާދަކުރައްވާ ކާމިޔާބު ކުރެއްވީ އެމްޑީޕީގެ ކެނޑިޑޭޓް މުހައްމަދު ސިމާއުއެވެ.
އެރަށުގެ ކައުންސިލް މެންބަރު ކަމަށް އިންތިޚާބުވީ އެމްޑީޕީގެ ދެ ކެނޑިޑޭޓުން ކަމަށްވާ ހުސައިން ޒާހިދު އާއި އިބްރާހިމް މުފީދެވެ. މި ދެ ކެނޑިޑޭޓުންނާ ވާދަކުރެއްވީ ޕީޕީއެމްގެ ކެނޑިޑޭޓް އާއިޝަތު ނަސްރާ އާއި ޖޭޕީގެ ދެ ކެނޑިޑޭޓުން ކަމަށްވާ އަހްމަދު ޔޫސުފާއި އަބްދުﷲ މޫސާއާއެވެ.
ކުރެންދޫ ކައުންސިލްގެ އަންހެނުންނަށް ޚާއްސަ ދެ ގޮނޑި ކާމިޔާބުކުރި އެމްޑީޕީގެ ދެ ކެނޑިޑޭޓުންނަކީ ވަފިއްޔާ މުހައްމަދާއި ޛިފްލާ އިބްރާހިމެވެ. މި ދެ ކެނޑިޑޭޓުންގެ ވާދަވެރިންނަކީ ޕީޕީއެމްގެ އާއިޝަތު ވިޝާމާ އާއި އާމިނަތު ޢިނާޔާގެ އިތުރުން ޖޭޕީގެ ފާތިމަތު އުޘްމާނެވެ.
މި އިންތިޚާބުގައި ކުރެންދޫގެ ހުރިހާ ގޮނޑިއެއް އެމްޑީޕީން ކާމިޔާބު ކޮށްފައިވާއިރު މިހާރު ވެސް އެރަށުގައި އޮތީ އެމްޑީޕީގެ މެޖޯރިޓީ އޮތް ކައުންސިލެކެވެ.
