ތިން ގޮނޑި ޕީޕީއެމަށް ދީ އައްޑޫން ވެސް ދިނީ މެސެޖެއް!
އިއްޔެ ބޭއްވި ލޯކަލް ކައުންސިލް އިންތިޚާބުގައި އައްޑޫ ސިޓީ ކައުންސިލްގެ ތިން ގޮނޑި ކާމިޔާބުކޮށް ޕީޕީއެމުން ތާރީޚީ ކާމިޔާބެއް ހޯދައިފިއެވެ.
އައްޑޫ ސިޓީ އަކީ މީގެ ކުރިން އަބަދުވެސް އެމްޑީޕީގެ ފުރިހަމަ އަޣްލަބިއްޔަތު ލިބޭ ސިޓީއެކެވެ. އެހެން ނަމަވެސް މިފަހަރު މަންޒަރު ބަދަލުވެ ޕީޕީއެމުން މިވަނީ އެ ސިޓީގެ ކައުންސިލުން ވެސް ތިން ގޮނޑި ކާމިޔާބު ކޮށްފައެވެ. ޕީޕީއެމުން ކާމިޔާބު ކުރި ގޮނޑިތަކަކީ ފޭދޫ ދާއިރާގެ ގޮނޑި (މަރިޔަމް ސަލްމާ) އާއި ފޭދޫ ވާދެލަ ދާއިރާ (މުހައްމަދު ފައިސަލް) އާއި މީދޫ ދާއިރާ (އާމިނަތު ސާލިހާ)ގެ ގޮނޑިއެވެ.
މީގެ އިތުރުން ހަމަ އެހެންމެ އެ ސިޓީގެ ކައުންސިލަށް އަމިއްލަ ގޮތުން ވާދަ ކުރެއްވި ތިން ކެނޑިޑޭޓަކު ވެސް ވަނީ ކާމިޔާބު ހޯއްދަވާފައެވެ. އެއި ހިތަދޫ މޫލެކެޑެ ދާއިރާގެ ގޮނޑި (އަހްމަދު ސަޢީދު) އާއި ހިތަދޫ މާމެންދޫ ދާއިރާގެ ގޮނޑި (އާމިނަތު އަދާލާ) އާއި މަރަދޫ ދާއިރާގެ ގޮނޑި (އަހްމަދު ނާދިރު)ގެ ގޮނޑިއެވެ.
މިއާއެކު އައްޑޫ ސިޓީ ކައުންސިލްގެ ހަ ގޮނޑި އެމްޑީޕީއަށް މިހާރު ގެއްލިފައިވާއިރު އެމްޑީޕީއަށް އައްޑޫ ސިޓީން ކާމިޔާބު ކުރެވުނީ 6 ގޮނޑިއެވެ. އަދި އެމްޑީޕީއަށް ކައުންސިލްގެ މެޖޯރިޓީ ލިބެނީ މޭޔަރުގެ ގޮނޑި އެއްކޮށްލުމުންނެވެ.
އެމްޑީޕީން ކާމިޔާބު ކުރި ގޮނޑިތަކަކީ ހިތަދޫ ކޮރޮވައު ދާއިރާއިން ޝިނާޒް އިބްރާހިމް މޫސާ އާއި ހިތަދޫ ބޭރުމަތީ ދާއިރާގެ އަންހެނުންނަށް ޚާއްސަ ގޮނޑިން މަރިޔަމް ސައީދާ އާއި ހިތަދޫ މެދުވައު ދާއިރާއިން މުހައްމަދު ޝުއާއު އާއި ހިތަދޫ ރަސްގެދަރަ ދާއިރާއިން ހުސެއިން ޒަރީރު އާއި މަރަދޫ ފޭދޫ ދާއިރާއިން ހާލިދާ މުހައްމަދުގެ އިތުރުން ހުޅުދޫ ދާއިރާއިން ހުސެއިން ފައިޒުރަހަވަން އެވެ.
އެމްޑީޕީއަށް މިފަހަރު ސާފު މެޖޯރިޓީ ގެއްްލިފައިވާއިރު މިހާރު އައްޑޫ ސިޓީގައި އޮތް ކައުންސިލަކީ 100 އިންސައްތަ އެމްޑީޕީ ކައުންސިލެކެވެ.
