ރައީސް ނަޝީދުގެ ރާގު ބަދަލު ކުރައްވައިފި، މިހާރު ވިދާޅު ވަނީ މުޢިއްޒަކީ ޤާބިލް ބޭފުޅެެއް ކަމަށް
މާލޭގެ މޭޔަރު ކަމަށް ހޮވިވަޑައިގެންފައިވާ ކުރީގެ ހައުސިންގ މިނިސްޓަރ ޑރ.މުޙައްމަދު މުޢިއްޒަކީ ޤާބިލް ބޭފުޅެއް ކަމަށް މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ލޯކަލް ކައުންސިލް އިންތިޚާބުގައި މުޢިއްޒަށް ވަރަށް ބޮޑަށް ފާޑު ވިދާޅުވަމުން ގެންދެވި، ރައީސް ނަޝީދު މިއަދު އެމްޑީޕީގެ އޮފީހުގައި އޮތް ނޫސްވެރިންގެ ބައްދަލު ވުމެއްގައި ވިދާޅުވީ، މުއިއްޒަކީ ރަނގަޅު، ގާބިލް އަދި ކެރޭ ބޭފުޅެއް ކަމަށެވެ. އަދި މާލޭގެ މޭޔަރުގެ މަޤާމުގައި ހުންނަވައިގެން ރައްޔިތުންނަށް ފައިދާ ވާނެހެން ކުރައްވާ ކަންކަމުގައި އެމަނިކުފާނުގެ ފުރިހަމަ އެއްބާރުލުން ލިބިގެންދާނެ ކަމަށް ވެސް ރައީސް ނަޝީދު ވިދާޅުވިއެވެ.
ރައީސް ނަޝީދު އިތުރަށް ވިދާޅުވީ މާލޭ ސިޓީގެ މޭޔަރު ކަމަށް އެމްޑީޕީއިން ނެރުނު ކެނޑިޑޭޓް، އަނަސް އަބްދުއްސައްތާރަކީ އެމްޑީޕީ މެމްބަރުން ޕްރައިމަރީން ނެރުނު ބޭފުޅެއް ކަމަށާއި އިންތިހާބުގައި އަނަސްއަށް ނާކާމިޔާބުވެ ވަޑައިގަތަސް އޭނާގެ ސިޔާސީ ހަޔާތް ކުރިއަށް އޮތް ތަނުގައި ކާމިޔާބު ވާނެ ކަމަށެވެ. އަނަސް އަކީ ވެސް ގާބިލު ކެރޭ ބޭފުޅެއް ކަމަށް ނަޝީދު ވިދާޅުވިއެވެ.
މީގެ އިތުރުން އެމްޑީޕީއަށް މާލެއިން ނާކާމިޔާބުވި ނަމަވެސް ލާމަރުކަޒީ ނިޒާމަށް އުނި ކަމެއް ނާންނާނެ ކަމަށް ވެސް ވިދާޅުވިއެވެ.
"އެމްޑީޕީއަށް ނާކާމިޔާބުވީ ނަމަވެސް ލާމަރުކަޒީ ނިޒާމު އުވައެއް ނުލާނަން. ސިޓީ ކައުންސިލް މެމްބަރުންގެ އަޣުލަބިއްޔަތުން ކަމެއް ނިންމައިފި ނަމަ އެކަމަށް އަޅުގަނޑު އިހުތިރާމް ކުރާނަން. ލާމަރުކަޒީ ނިޒާމް އަޅުގަނޑުމެން ގެނައީ ވަރަށް ދުވަހު އެކަމާ އުޅުމަށް ފަހު. މިގޮތަށް ނުވެއްޖިއްޔާ އެހެން ގޮތެއް ހޯދާނީ." ރައީސް ނަޝީދު ވިދާޅުވިއެވެ.
ތަނެއްގަ ހުރި ހިޔަޅެއް.