ކާމިޔާބު ލިބުނީ ދީނާއި ތަރައްޤީގެ ފިކުރު އިސްކޮށްގެން: ޑރ. މުޢިއްޒު
އިއްޔެ ބޭއްވި ލޯކަލް ކައުންސިލުތަކުގެ އިންތިހާބުގައި މާލެސިޓީގެ މޭޔަރުކަން ކާމިޔާބު ކުރެއްވުނީ އިސްލާމްދީނާއި ތަރައްޤީގެ ފިކުރު އިސްކޮށްގެން ކަމަށް ޑރ. މުޙައްމަދު މުޢިއްޒު ވިދާޅުވެއްޖެއެވެ.
"މީ މަގޭ ރާއްޖެ އަލިވިލުން" ގެ ނަމުގައި އިދިކޮޅު ޕީޕީއެމްއިން މިރޭ ބޭއްވި ޚާއްސަ އިވެންޓުގައި ވާހަކަފުޅު ދައްކަވަމުން ޑރ. މުޢިއްޒު ވިދާޅުވީ މާލޭސިޓީ ކައުންސިލްގެ މައްޗަށް ޕީޕީއެމުން ބާރު ހޯދީ، ދީނާއި ތަރައްގީގެ ފިކުރު އިސްކޮށްގެން ކަމަށާއި އެއީ ޕާޓީގެ ލީޑަރު އަދި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ފިކުރުގައި ކަމަށެވެ.
ޑރ. މުޢިއްޒު ވިދާޅުވީ އޭނާ މި އިންތިހާބަށް ނުކުންނެވީ ރައީސް ޔާމީން ދަސް ކޮށްދެއްވި ފިކުރުގައި ކަމަށެވެ.
"އެއީ ދީނީ ފިކުރާއި ތަރައްގީގެ ފިކުރު. އިންތިހާބު ކާމިޔާބު ކުރެވުނު އަނެއް ސަބަބަކީ މުއިއްޒު މި ސަރުކާރުގެ ދެ އަހަރާއި ބައިގެ ތެރޭގައި، މާލޭގެ ރައްޔިތުންނަށް ވެފައިވާ ވައުދުތައް ނުފުއްދެވުން" ޑރ.މުޢިއްޒު ވިދާޅުވިއެވެ.
ޑރ. މުޢިއްޒުގެ ވާހަކަފުޅުގައި އިތުރަށް ވިދާޅުވީ ކެމްޕޭނު ދުވަސްވަރު މާލޭގެ ގެތަކަށް ވަޑައިގެންނެވިއިރު، މާލޭގެ ގިނަ މީހުންގެ މޫނުމަތިން ފެނުނީ މާޔޫސް ކަމާއި ހިތްދަތިކަން ކަމަށެވެ. ބޯހިޔާވަހިކަން ދޭނެ ކަމަށް ސަރުކާރުން ވި ވައުދު ނުފުއްދުމުގެ ސަބަބުން، ގިނަ ބަޔަކު އުޅެނީ ވަރަށް ހާލުގައި ކަމަށް ވެސް ޑރ.މުޢިއްޒު ވިދާޅުވިއެވެ.
"ކޮން ބާރެއްތޯ (އެމްޑީޕީއަށް) ނުލިބެނީ؟ ސަރުކާރާއި ރައްޔިތުންގެ މަޖިލީހުގެ މެޖޯރިޓީ އާއި މިހާތަނަށް މާލޭ ސިޓީ ކައުންސިލް ވެސް އެ އޮތީ އެ މީހުންނަށް. އެކަމަކު އެ ހުރިހާ ކަމެއް އޮވެ، މާލޭ ރައްޔިތުން ބޭނުންވާ ގޮތަކަށް ކަންތައްތަކެއް ނުވޭ،" ޑރ.މުޢިއްޒު ވިދާޅުވިއެވެ.
ޑރ. މުޢިއްޒު ވިދާޅުވީ އިދިކޮޅު ޕީޕީއެމްއަށް ދިވެހި ރައްޔިތުން ވޯޓު ދިނީ، ދީނީ އަދި ގައުމީ ވިސްނުމުގައި ކަމަށެވެ. އެހެންވެ، އެ ހުރިހާ ކަމަކުން އުއްމީދު ލިބިވަޑައިގަންނަވާ ކަމަށާއި ދީނާއި ގައުމަށް ޣައްދާރުވާ، މިނިވަންކަން ގެއްލޭ ގޮތަށް އަމަލުކުރާ މީހުންނަށް ފުރުސަތު ނުދޭނެ ކަން އެނގިވަޑައިގެންނެވި ކަމަށް ވެސް އެމަނިކުފާނު ވިދާޅުވިއެވެ.
