އެމްޑީޕީން ކެނޑިނޭޅި ދަނީ އީސީއަށް ނުފޫޒު ފޯރުވާ ، ފޮށިތަކުގެ ނަތީޖާ ބަދަލު ކުރަމުން: ޝިޔާމް
އެމްޑީޕީން ކެނޑިނޭޅި އީސީއަށް ނުފޫޒު ފޯރުވާ ފޮށިތަކުގެ ނަތީޖާ ބަދަލު ކުރަމުން ދާ ކަމަށް ޕީޕީއެމްގެ ނައިބުރައީސް އަޙްމަދު ޝިޔާމް ވިދާޅުވެއްޖެއެވެ.
ރޭ ޝިޔާމް ކުރެއްވި ޓްވީޓެއްގައި ވިދާޅުވީ އެ ޕާޓީއަށް ލޯކަލް ކައުންސިލް އިންތިޚާބުގައި ލިބުނީ ބޮޑު ކާމިޔާބެއް ކަމަށެވެ.އެހެން ނަމަވެސް އެމްޑީޕީން ދަނީ މާލެ ސިޓީ އާއި ބޮޑެތި ސިޓީތަކުގެ ފަރަގު ކުޑަކުރަމުން ކަމަށް ވިދާޅުވެ އެމްޑީޕީން އީސީއަށް ނުފޫޒު ފޯރުވާ ކަމަށް ތުހުމަތު ކުރެއްވިއެވެ.
“ ލޯކަލް ކައުންސިލް އިންތިހާބުގައި ޕީޕީއެމްއަށް ލިބުނު ކާމިޔާބީއަކީ ރައްޔިތުންނަށް ލިބުނު ނަސްރެއް. އެމްޑީޕީން ކެނޑި ނޭޅި ދަނީ އީސީއަށް ނުފޫޒު ފޯރުވާ ފޮށި ތަކުގެ ނަތީޖާ ބަދަލު ކުރަމުން. ހާއްސަކޮށް މާލެ ސީޓީ އަދި ބޮޑެތި ސިޓީ ތަކުގެ ފަރަގު ކުޑަ ނަތީޖާތައް ބަދަލު އެބަ ކުރޭ. ރައްޔިތުން ގޮތް ނިންމާފައި ވަނީ. “ ޝިޔާމް ވިދާޅުވިއެވެ.
މީގެ ރޭ ޕީޕީއެމުން ބޭއްވި ،ކާމިޔާބީ ފާހަގަ ކުރުމުގެ ހަފްލާގައި ޝިޔާމް ވިދާޅުވީ ޕާޓީގެ މާލީ ޙާލަތާއި، ދަތުރު ކުރުމުގައީ ކެމްޕޭން ކުރުމުގައި ޕާޓީއަށް ހުރި ދަތިތަކާއެކު އެ ޕާޓީއަށް ލިބުނު ކާމިޔާބަކީ އެ ޕާޓީގެ ފަރާތުން ވާދަކުރެއްވި ކެނޑިޑޭޓުންނަކީ ޤައުމަށް އިޚުލާޞްތެރި ތެދުވެރި ބައެއް ކަމަށް ރައްޔިތުންގެ ޤަބޫލު ކުރުމުން ލިބުނު ކާމިޔާބެއް ކަމަށެވެ.
