ކައުންސިލްތަކުގެ 43 އިންސައްތަ އެމްޑީޕީން ވަނީ ކާމިޔާބު ކޮށްފައި: ރައީސް ޞާލިޙް
ލޯކަލް ކައުންސިލްތަކުގެ 43 އިންސައްތަ އެމްޑީޕީން ވަނީ ކާމިޔާބު ކޮށްފައި ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ރައީސް ޞާލިޙް ވިދާޅުވީ، މިހާތަނަށް ގުނި ވޯޓުތަކުގެ ތެރެއިން 43 އިންސައްތަ ގޮނޑި އެމްޑީޕީން ކާމިޔާބު ކުރި ކަމަށެވެ. އަދި 92 ޕަސެންޓް ވޯޓު ގުނި އިރު އޭގެ ތެރެއިން 49 ޕަސެންޓް އެމްޑީޕީން ކާމިޔާބު ކުރި ކަމަށް ވެސް ރައީސް ވިދާޅުވިއެވެ.
"އެއީ މިޑްޓާމް އިލެކްޝަނެއްގައި އެއްވެސް ސަރުކާރަކަށް ލިބިފައިވާ ކާމިޔާބެއް ނޫން. އެކަމަކު މާލޭ ރައްޔިތުންގެ ކަންބޮޑުވުންތަކެއް ހުރިކަން ވޯޓުގެ ނަތީޖާ އިން އެނގިފައިވޭ. އެކަންކަމަށް ކުރިއަށް އޮތްތާނގައި އެޑްރެސް ކުރާނަން." ރައީސް ޞާލިޙް ވިދާޅުވިއެވެ.
ރައީސް ޞާލިޙް ވިދާޅުވީ ބޯހިޔާވަހިކަމާއި ކޮވިޑްގެ ރެސްޓްރިކްޝަންގެ އަސަރު މާލެއަށް ހުރިކަން އެނގި ވަޑައިގެންފައިވާ ކަމަށެވެ. ޚާއްސަކޮށް ކެފޭ،ރެސްޓޯރަންޓްތަކަށާއި އާންމުންގެ ދިރިއުޅުމަށް ވަރަށް ބޮޑު އަސަރެއް ކުރިކަން އެނގިވަޑައިގެންފައިވާ ކަމަށް ވެސް ރައީސް ޞާލިޙް ވިދާޅުވިއެވެ.
"އަޅުގަނޑުމެން އެކަން ކުރީ އޭރު އެއީ މުޅި ގައުމުގެ ފައިދާއަށް ބަލައިގެން. އޭގެ އިތުރުން ކޮރަޕްޝަނާއި އެމްއެމްޕީއާރުސީގެ ކޮރަޕްޝަނާއި މަރުގެ ހަގީގަތްތައް ހޯދުމުގައި ލަސްވުން އެއީ ވެސް ކަންބޮޑުވުމެއް." ރައީސް ޞާލިޙް ވިދާޅުވިއެވެ.
މީގެ އިތުރުން ރައީސް ވިދާޅުވީ ވޭތުވެދިޔަ ދެ އަހަރުގެ ތެރޭގައި އެމްޑީޕީން ކުރެވުނީ ކޮން ކަމެއްތޯ ބަލާލަން އެބަ ޖެހޭ ކަމަށެވެ. މަޖިލީހުގެ ބޮޑު މެޖޯރިޓީ އާއި ސަރުކާރާ އެކު މި އައި ބަދަލު ބަލައިލަން ޖެހޭ ކަމަށާއި އެކަންކަން ބައްލަވާނެ ކަމަށް ވެސް ރައީސް ވިދާޅުވިއެވެ.
