އިންތިހާބުގެ ވަގުތީ ނަތީޖާ އިއުލާނު ކުރުން މިރޭ 9 ޖަހާއިރު
މި މަހުގެ 10ވަނަ ދުވަހު ބޭއްވި ލޯކަލް ކައުންސިލުތަކުގެ އިންތިހާބުގެ ވަގުތީ ނަތީޖާ މިރޭ 9:00 ޖަހާއިރު އިއުލާނު ކުރާނެކަމަށް އިލެކްޝަންސް ކޮމިޝަން (އީސީ)އިން ބުނެފިއެވެ.
އިންތިހާބުގެ ވަގުތީ ނަތީޖާ އިއުލާނު ކުރާނެ ކަމަށް އެންމެ ފުރަތަމަ އެ ކޮމިޝަނުން ބުނީ އިއްޔެ ހަވީރުއެވެ. ނަމަވެސް ފަހުން ރޭގެ 12ގެ ފަހުން އިއުލާނު ކުރާނެ ކަމަށް ބުނެފައި މިރޭ ބުނީ 9:00ގައި އިއުލާނު ކުރާނެ ކަމަށެވެ.
މިފަހަރުގެ އިންތިޚާބުގައި ވޯޓްލާން ނިކުމެފައި ވަނީ ވޯޓްލުމުގެ ހައްގު ލިބިފައިވާ މީހުންގެ 65 އިންސައްތަ މީހުންނެވެ. ލޯކަލް ކައުންސިލްގެ އިންތިޚާބުތަކުގައި މާޒީގައި އާންމުކޮށް ނިކުމެފައި ވަނީ 60 އާއި 70 ޕަސެންޓާ ދެމެދުގެ އަދަދެއްގެ މީހުންނެވެ.
މި އަހަރުގެ އިންތިޚާބުގައި އިދިކޮޅު ޕީޕީއެމުން ވަނީ މާލެ ސިޓީގެ މޭޔަރު ހިމެނޭހެން އެ ސިޓީގެ ސްޕަރ މެޖޯރިޓީ ހޯދައިފައެވެ. މިއީ އެމްޑީޕީއަށް މާލެ ގެއްލުނު ފުރަތަމަ ފަހަރެވެ.
