އިންތިޚާބުގެ ދާއިމީ ނަތީޖާ އިއުލާން ކުރުން އަންގާރަ ދުވަހު
ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގެ ދާއިމީ ނަތީޖާ އަންނަ އަންގާރަ ދުވަހު އިއުލާން ކުރަން ފަށާނެ ކަމަށް އިލެކްޝަން ކޮމިޝަނުން ވިދާޅުވެއްޖެއެވެ.
އިލެކްޝަން ކޮމިޝަނުން ވިދާޅުވީ އިންތިޚާބާ ގުޅިގެން ގިނަ ޝަކުވާތަކެއް ހުށަހަޅާފައިވާ ކަމަށާއި، ކޮމިޝަނަށް ހުށަހެޅިފައިވާ ޝަކުވާތަކުގެ ތެރެއިން ކޮންޕްލެއިން ބިއުރޯތަކާއި ސިޔާސީ ޕާޓީތަކުން ހުށަހަޅާފައިވާ ޝަކުވާތައް ވެސް ބަލަމުން ދާކަމަށެވެ.
ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވީ އިންތިޚާބާ ގުޅިގެން ސިޔާސީ ޕާޓީތަކުން ވަނީ 21 ޝަކުވާއެއް ހުށައަޅާފައި ވާކަމަށެވެ. އަދި ކޮމްޕްލެއިންސް ބިއުރޯތަކަށް 100 އަށް ވުރެ ގިނަ ޝަކުވާ ހުށައަޅާފައިވާ ކަމަށް ޙަބީބު ވިދާޅުވިއެވެ.
މި އިންތިޚާބުގެ ވަގުތީ ނަތީޖާތައް އިއުލާންކޮށް ރޭ ވަނީ ނިންމައިލައިފައެވެ.
އިންތިހާބުގެ ވަގުތީ ނަތީޖާއަށް ބަލާއިރު ހއ. ތަކަންދޫ އާއި ބ. ކިހާދޫ ގައި ދެވަނަ ބުރު ބާއްވަންޖެހެއެވެ. އެ ދެ ރަށުގެ ކައުންސިލަށް އިންތިހާބު ކުރަން ޖެހެނީ ފަސް މެންބަރުންނެވެ. ނަމަވެސް އެންމެ މަތިން ވޯޓް ހޯދި ހަތަރު ކެންޑިޑޭޓުންގެ ފަހަތުން ދެ ކެންޑިޑޭޓަކު ވަނީ އެއްވަރަށް ވޯޓް ހޯދާފައެވެ.
އިލެކްޝަންސް ކޮމިޝަންގެ މެންބަރު ފުއާދު ތައުފީގު ވިދާޅުވީ އިންތިހާބުގެ ދެވަނަ ބުރު ބާއްވަން ޖެހޭ ރަށްތައް ފައިނަލް ކުރުމަށާއި އިންތިހާއި ގުޅޭ ގޮތުން ލިބިފައިވާ ޝަކުވާތަކާ މެދު ގޮތެއް ނިންމުމަށް ކޮމިޝަންގެ ރަސްމީ ބައްދަލުވުމެއް މިއަދު ބާއްވަން ނިންމާފައިވާ ކަމަށެވެ.
