އެމްޑީޕީން ޝަކުވާ ހުށަހެޅި ފޮށިތައް އަލުން ނުގުނާނަން: އީސީ
ވެރިކަން ކުރާ އެމްޑީޕީން ޝަކުވާ ހުށަހެޅި ފޮށިތައް އަލުން ގުނުމަށް ނިންމާފައި ނުވާ ކަމަށް އިލެކްޝަންސް ކޮމިޝަން (އީސީ) އިން ވިދާޅުވެއްޖެއެވެ.
މި މަހުގެ 10 ވަނަ ދުވަހު ބޭއްވި ލޯކަލް ކައުންސިލު އިންތިހާބާ ގުޅޭގޮތުން އެމްޑީޕީން ވަނީ ހަ ދާއިރާއެއްގެ ވޯޓު ފޮށީގެ ޝަކުވާ ހުށަހަޅާފައެވެ. އެއީ މެދު ހެންވޭރު ދާއިރާ, ހެންވޭރު ދެކުނު ދާއިރާ، ހެންވޭރު ހުޅަނގު ދާއިރާ، މައްޗަންގޯޅި އުތުރު ދާއިރާގެ އިތުރުން މާފަންނު އުތުރު ދާއިރާ، މާފަންނު ހުޅަނގު ދާއިރާއެވެ.
އެ ޕާޓީން މައިގަނޑު ގޮތެއްގައި ފާހަގަކޮށްފައި ވަނީ ބާތިލް ވޯޓު، ދެ ކެނޑިޑޭޓުންގެ މެދުގައިވާ ފަރަގަށް ވުރެ އިތުރުވެފައިވާ ކަމެވެ. އަދި ވޯޓު ބާތިލްކަމަށް ކަނޑައެޅި ގޮތާ މެދު އެމްޑީޕީން ވަނީ ހިތްހަމަ ނުޖެހުން ފާޅު ކޮށްފައެވެ.
އިލެކްޝަންސް ކޮމިޝަނުން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ކޮމިޝަންގެ ރައީސް އަހުމަދު ޝަރީފު ވިދާޅުވީ ބާތިލް ވޯޓު އިތުރުވުމަކީ ވޯޓު ފޮށި އަލުން ގުނަންޖެހޭ ސަބަބެއް ކަމަށް ގަބޫލު ނުކުރައްވާ ކަމަށެވެ. އަދި ދެ ކެނޑިޑޭޓުންގެ މެދުގައިވާ ފަރަގަށް ވުރެ ބާތިލް ވޯޓު އިތުރުވުމަކީ ވެސް ސަބަބެއްކަމަށް ކޮމިޝަނުން ނުދެކޭ ކަމަށެވެ.
"ވޯޓު ބާތިލް ވާނެ ގޮތްތައް އިންތިހާބުގެ ކުރިން ވަނީ އާންމުންނަށް ބުނެ ދެވިފަ. އަދި ބާތިލް ވޯޓު އިތުރުވި ސަބަބަކީ ފަރުދީ ޒިންމާ އަދާ ނުކުރުމުގެ ސަބަބުން. މާލޭގެ ގިނަ ފޮށިތަކުގައި ބާތިލް ވޯޓު އިތުރުވީ ވޯޓު ކަރުދާހުގައި އެއްވެސް ފާހަގައެއް ނެތުމުގެ ސަބަބުން." ޝަރީފު ވިދާޅުވިއެވެ.
އެމްޑީޕީން ހުށަހެޅި މައްސަލައިގައި ބުނެފައިވާގޮތުން ލޯކަލް ކައުންސިލް އިންތިޚާބުގައި އެއް ކަރުދާހުގައި ކިތަންމެ ގިނަ ވޯޓެއް ހުރިކަމުގައި ވީނަމަވެސް، ވަކި ވޯޓެއް ޞައްޙަވުމުގައި ފުރިހަމަވާން ޖެހޭ ކަމަށް ޤާނޫނުން ކަނޑައަޅާފައިވާ ޝަރުޠުތައް ފުރިހަމަ ވާނަމަ އެ ވޯޓެއް ޞައްޙަ ވާނެއެވެ.
Ads by STO
