އިންތިޚާބުގެ ދެވަނަ ބުރު 10 ރަށެއްގައި، އިންތިޚާބު މެއި 1 ގައި
އޭޕްރީލް މަހުގެ 10 ވަނަ ދުވަހު ބޭއްވި ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގެ ދެވަނަ ބުރެއް 10 ރަށެއްގައި ބާއްވަން ޖެހިއްޖެއެވެ.
އިލެކްޝަންސް ކޮމިޝަނުން މިރޭ ބޭއްވު ނޫސްވެރިންގެ ބައްދަލުވުމެއްގައި އެ ކޮމިޝަންގެ ރައީސް އަހްމަދު ޝަރީފް ވިދާޅުވީ ކައުންސިލްތަކުގެ އިންތިޚާބުގެ ދެވަނަ ބުރެއް ހަތަރު ރަށެއްގައި އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިޚާބުގެ ދެވަނަ ބުރެއް ހަ ރަށެއްގައި ބާއްވަން ޖެހިފައިވާ ކަމަށެވެ.
ކައުންސިލްތަކުގެ އިންތިޚާބުގެ ދެވަނަ ބުރަކަށް ދާން ޖެހެނީ ހއ.ތަކަންދޫ، ބ.ކިހާދޫ، ފ.ދަރަނބޫދޫ އަދި ލ.މާވަށުގައެެވެ.
ތަކަންދޫގައި ދެވަނަ ބުރެއް ބާއްވަން ޖެހެނީ އެ ރަށު ކައުންސިލުގައި އަންހެނުންނަށް ޚާއްސަ ދެ ގޮނޑީގެ ތެރެއިން ކުރި ހޯދި ކެނޑިޑޭޓުގެ ފަހަތުން ތިބި ދެ ކެނޑިޑޭޓަކަށް ލިބުނު ވޯޓު އެއްވަރު ވެގެންނެވެ. އެގޮތުން އެ ދެ ކެނޑިޑޭޓުންނަށް ވެސް ލިބިފައި ވަނީ 285 ވޯޓެވެ.
ކިހާދޫގައި ވެސް ދެވަނަ ބުރަށް ދާން ޖެހެނީ ދެ ކެނޑިޑޭޓަކު އެއްވަރުވެ އެ ގޮނޑި ކަށަވަރު ކުރާ ކެނޑިޑޭޓެއް ކަނޑައެޅުމަށެވެ. އަދި ދަރަނބޫދޫގައި ވެސް ވޯޓުލާން ޖެހެނީ އަންހެނުންނަށް ޚާއްސަ ދެ ގޮނޑީގެ ތެރެއިން އެއް ގޮނޑި ވޯޓު އެއްވަރުވުމުގެ ސަބަބުން ކަށަވަރު ނުވާތީއެވެ. އެގޮތުން އެ ރަށުގައި ދެ ކެނޑިޑޭޓުންގެ ވޯޓު އެއްވަރުވީ 172 ވޯޓުންނެވެ.
ލ.މާވަށުގައި ވެސް ވަނީ ދެ ކެނޑިޑޭޓެއްގެ ވޯޓު އެއްވަރުވެފައެވެ. އެރަށު ކައުންސިލަށް ވާދަކުރި އެމްޑީޕީ އަދި ޕީޕީއެމްގެ ކެނޑިޑޭޓް ވަނީ 525 ވޯޓުން އެއްވަރުވެފައެވެ. އަދި އެރަށު ކައުންސިލްގެ މެންބަރުކަމަށް ކުރިމަތިލި ދެ ކެނޑިޑޭޓެއްގެ ވޯޓު ވެސް އެއްވަރުވެފައި ވާއިރު އެ ރަށުގެ ވޯޓު ފޮއްޓަށް ދާއިރާއިން ބޭރު މީހަކު ވެސް ވޯޓު ލައިފައި ވާކަން ވަނީ ކަށަވަރުވެފައެވެ.
އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިޚާބުގެ ދެވަނަ ބުރު ބާއްވަން ހަމަޖެހިފައިވާ ހަ ރަށަކީ ހއ.އުލިގަން، ނ.މަނަދޫ، ރ.މާކުރަތު، ބ،ކެންދޫ، ވ.ފުލިދޫގެ އިތުރުން ލ.ކަލައިދޫއެވެ. މި ހުރިހާ ރަށެއްގައި ވެސް ވޯޓުލާން ޖެހެނީ ދެ ކެނޑިޑޭޓަކު ވޯޓު އެއްވަރު ވެގެންނެވެ.
ގާދިއްފުށީގައި އަލުން ވޯޓަށް
ތ.ގާދިއްފުށީގައި އަލުން ވޯޓު ނެގުމަށް ވެސް އީސީއިން ވަނީ ނިންމާފައެވެ.
އެރަށުގައި އަލުން ވޯޓުލާން ޖެހެނީ ދާއިރާއިން ބޭރުގެ ދެ މީހަކު އެ ރަށު ފޮއްޓަށް ވޯޓު ލައިފައިވާތީއެވެ. އެ ދެ މީހުން ވެސް ވޯޓު ލައިފައި ވަނީ އެ ރަށު ކައުންސިލަށް ޚާއްސަ ވޯޓު ކަރުދާސްކޮޅުތަކުގައެވެ. އެރަށުގައި އަލުން ވޯޓްލާން ނިންމީ އެ ރަށު ކައުންސިލްގެ އަންހެނުންނަށް ޚާއްސަ ކުރި ދެ ގޮނޑީގެ ތެރެއިން ދެވަނަ އަދި ތިންވަނައަށް ދިޔަ ދެ ކެނޑިޑޭޓުންގެ ދެމެދުގައި ދެ ވޯޓުގެ ފަރަގު ހުރުމުން ވޯޓުގެ ސައްހަކަން ގެއްލިފައިވާތީއެވެ.
ދެވަނަ ބުރުގެ ވޯޓުލުން މެއި 1ގައި ބޭއްވުމަށް ނިންމާފައިވާ ކަމަށާއި މާދަމާ އިންތިޚާބު އިއުލާން ކުރުމުން ކެމްޕެއިން ކުރުމުގެ ފުރުސަތު ކެނޑިޑޭޓުންނަށް ލިބޭނެ ކަމަށް ވެސް އީސީގެ ރައީސް ވިދާޅުވެފައި ވެއެވެ.
