ރަށު ރައީސަށް 23،000 ،ސިޓީ މޭޔަރަށް 40،000 ރުފިޔާ

އަލަށް އިންތިހާބުވި ކައުންސިލަރުންނަށް ދޭނެ މުސާރަ ރައްޔިތުންގެ މަޖިލީހުގެ މާލިއްޔަތު ކޮމިޓީން ކަނޑައަޅައިފިއެވެ.

Ads by STELCO

މާލިއްޔަތު ކޮމިޓީން ފާސްކޮށްފައިވާ މުސާރައިގެ ތަފްސީލަށް ބަލާއިރުު އެންމެ ބޮޑު މުސާރައެއް ކަނޑައަޅާފައިވަނީ ސިޓީތަކުގެ މޭޔަރުންނަށެވެ. އެގޮތުން މޭޔަރަށް މުސާރައިގެ ގޮތުގައި 30،000 ރުފިޔާ އަދި އެލަވަންސްގެ ގޮތުގައި 10،000 ރުފިޔާއާއެކު، ޖުމްލަ 40،000 ރުފިޔާގެ މުސާރައެއް ދިނުމަށް ކޮމިޓީން ވަނީ ކަނޑައަޅައިފައެވެ. މީގެ އިތުރުން ކޮމިޓީން ނިންމައިފައި ވަނީ އަތޮޅު ކައުންސިލް ތަކުގެ ރައީސުންނަށް 28،000 ރުފިޔާ އަދި ރަށު ކައުންސިލްތަކުގެ ރަައީސުންނަށް 23،000 ރުފިޔާ ދިނުމަށެވެ. އަދި ރަށު ކައުންސިލްތަކުގެ ނައިބުންނަށް 15،000 ރުފިޔާ އަދި މެންބަަރުންނަށް 12،000 ރުފިޔާ ދިނުމަށް ވެސް ކޮމިޓީން ނިންމައިފައި ވެއެވެ.

މީގެ އިތުރުން، ސިޓީތަކުގެ މޭޔަރުންނަށް 40،000 ރުފިޔާ، ޑެޕިއުޓީ މޭޔަރުންނަށް 35،000 ރުފިޔާ އަދި ސިޓީ ކައުންސިލްތަކުގެ މެންބަރުންނަށް 30،000 ރުފިޔާ ދިނުމަށް ވެސް މާލިއްޔަތު ކޮމިޓީން ނިންމާފައި ވެއެވެ.

ޕޭ ކޮމިޝަނުން ފޮނުވައިފައިވާ ގޮތަށް މުސާރަ ދިނުން ރަނގަޅު ކަމަށް ނިންމައި، ކޮމެޓީން ވަނީ އެގޮތަށް ފާސްކޮށްފައެވެ. ހަ ވޯޓުގެ ހަނި އަގުބިއްޔަތަކުން އެ ގޮތަށް ނިންމަން ފާސްކުރުމާ އެކު، އެ މައްސަލަ ދެން ދާނީ މަޖިލީހުގެ ތަޅުމަށެވެ. ކައުންސިލަރުންގެ މުސާރަ ބޮޑު ކުރުމަށް މާލިއްޔަތު ކޮމިޓީން ފާސްކުރި ނަމަވެސް ކޮމިޓީގެ ނިންމުމަށް އަމަލު ކުރެވޭނީ މަޖިލީހުގެ ތަޅުމުން ކޮމިޓީގެ ރިޕޯޓް ފާސްކުރުމުންނެވެ.