ރިސޯޓު މުވައްޒަފުންގެ 99 އިންސައްތަ،ކޮވިޑް ވެކްސިންގެ ފުރަތަމަ ޑޯޒް ޖަހައިފި: މިނިސްޓަރު
ރިސޯޓު މުވައްޒަފުންގެ ތެރެއިން 99 އިންސައްތަ މީހުން ކޮވިޑް-19އަށް ޖަހާ ވެކްސިންގެ ފުރަތަމަ ޑޯޒް ޖަހައިފި ކަމަށާއި މިފަދަ ކަންކަމުގެ ސަބަބުން ރާއްޖޭގެ ފަތުރުވެރިކަމަށް އިތުބާރު ބޮޑުވެގެންދާ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ، ޓޫރިޒަމް ދާއިރާގެ މަސައްކަތްތެރިންނަކީ ވެކްސިންގެ ދެ ޑޯޒް ފުރިހަމަ ކޮށްފައިވާ ބަޔަކަށް ހެދުމަށް އެމްއެމްޕީއާރުސީ އާއި ޓޫރިޒަމް މިނިސްޓްރީއިން ގުޅިގެން ފެށި "އައިއެމް ވެކްސިނޭޓެޑް" ކެމްޕެއިން ފެށުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މިނިސްޓަރު ވިދާޅުވީ، ރިސޯޓުތަކުގައި މަސައްކަތް ކުރާ 99 އިންސައްތަ މީހުންނަށް ވެކްސިންގެ ފުރަތަމަ ޑޯޒް މިހާރު ދެވިފައިވާ އިރު 8،000 މުވައްޒަފުން ދެވަނަ ޑޯޒް ޖަހާފައިވާ ކަމަށެވެ.
2020 ވަނަ އަހަރު ޓޫރިޒަމް ސިނާއަތުގެ މުވައްޒަފުން ވެކްސިން ނެތި މަސައްކަތްކުރީ ބުރަކޮށް ކަމަށާއި، އަނބިދަރިން ގާތަށް ރަށަށް ދެވޭނެ ގޮތެއް ވެސް ނެތް ކަމުގައި ފާހަގަ ކުރައްވައި މިނިސްޓަރު ވިދާޅުވީ، ވެކްސިން ފުރިހަމަކޮށްފައިވާ މުވައްޒަފުންނަށް މިހާރު އަނބިދަރިން ކައިރިއަށް ދެވޭނެ އިންތިޒާމު ހަމަޖެހިއްޖެ ކަމަށެވެ.
މީގެ އިތުރުން މިނިސްޓަރު ފާހަގަ ކުރެއްވި ގޮތުގައި ކޮވިޑާ އެކު ރާއްޖެއިން ގާއިމް ކުރި ފަތުރުވެރިކަމުގެ ޕްރޮޓޮކޯލް ދުނިޔެ ބަލައިގެންފައިވާއިރު، ރާއްޖޭގައި އޮތީ ރައްކާތެރި ޓޫރިޒަމެއްކަން ދުނިޔެ ބަލައިގެންފައިވާކަމަށް ވެސް މިނިސްޓަރު ވިދާޅުވިއެވެ.
މިއަދު އިފްތިތާހު ކުރި އައިއެމް ވެކްސިނޭޓެޑް ބެޖާއެކު ރާއްޖެ އަންނަ ޓޫރިސްޓުން ރާއްޖެއަށް ކުރާ އިތުބާރު ބޮޑުވާނެކަން މިނިސްޓަރު ފާހަގަ ކުރެއްވައި އިތުރަށް ވިދާޅުވީ، ރާއްޖޭގެ ފަތުރުވެރިކަމަށް ބޮޑު ކާމިޔާބެއް ލިބެނީ މުޅި ރާއްޖެ އެކަމުގައި ބައިވެރިވެގެން ކަމަށެވެ.
