ރިސޯޓުތަކަށް ލުއި ދިނީ ވަކި ބަޔަކަށް މަންފާ ހޯދައިދޭކަށެއް ނޫން: ސަރުކާރު

ބައެއް ރިސޯޓުތަކުން 2019 ވަނަ އަހަރު ދައުލަތަށް ދައްކަން ޖެހޭ ފައިސާ ދެއްކުން ފަސްކޮށްދީ، އެ ރިސޯޓުތައް ހިންގުމަށް އަލުން ހުއްދަ ދިނުމަކީ، ރައީސް އޮފީީހުގެ މިނިސްޓަރު އަލީ ޝިޔާމްގެ މަސްލަހަތު އޮންނަ ރިސޯޓުތަކަށް ހާއްސަކަމެއް ދީގެން ކުރި ކަމެއް ނޫން ކަމަށާއި، އެއީ މީގެ ކުރިން ވެސް ސަރުކާރުތަކުން ކޮށްދޭ ކަމެއް ކަމަށް ސަރުކާރުން ބުނެފިއެވެ.

Ads by STELCO

ދައުލަތަށް ދައްކަން ޖެހޭ ފައިސާ ނުދައްކައިގެން 2019 ވަނަ އަހަރުގެ މެއި މަހުގެ ތެރޭގައި ރިސޯޓު ހިންގުމުގެ ހުއްދަ ހަ ރިސޯޓަކަށް ބާތިލު ކުރިއެވެ. ނަމަވެސް ފަހުން އެ ފައިސާ ދެއްކުން ފަސްކޮށްދީ، ރިސޯޓު ހިންގުމުގެ ހުއްދަ ވެސް އަލުން ވަނީ ދީފައެވެ. އޭގެ ތެރޭގައި އަލީ ޝިޔާމްގެ މަސްލަހަތު އޮންނަ ތިން ރިސޯޓެއް ހިމެނޭ ކަމަށް އެނގިފައިވެއެވެ. އޭރު އެ ތިން ރިސޯޓުން ދައުލަަތަށް ދައްކަން ޖެހޭ ފައިސާގެ އަދަދު 198.5 މިލިއަން ރުފިޔާއަށް އަރައެވެ.

އަލީ ޝިޔާމްގެ މަސްލަހަތު އޮންނަ ތިން ރިސޯޓަށް އެތަން ހިންގުމުގެ ހުއްދަ އަލުން ދިނީ، ނުފޫޒު ފޯރުވައިގެން ކަމަށް ބުނެ ސަރުކާރަށް ފާޑުކިޔުން އަމާޒުވިއެވެ. އަދި އެ ފައިސާ ދައްކަން އޮތް މުއްދަތުގައި ފައިސާ ދައްކައިފައި ނުވާ ނަމަވެސް، ސަރުކާރުން ފިޔަވަޅު އަޅާފައި ނުވާ ކަމަށް ބުނެ ވެސް ބައެއް ފަރާތްތަކުން ދިޔައީ ފާޑު ކިޔަމުންނެވެ.

އެފާޑުކިޔުންތަކާ ގުޅިގެން އޮންލައިން ނޫހަކަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ، އެގޮތަށް ރިސޯޓުތަކުން ފައިސާ ދެއްކުމުގައި މީގެ ކުރިން ސަރުކާރު ތަކުން ވެސް ލުއި ދީފައިވާ ކަމަށެވެ. އަދި އެއީ ހަމައެކަނި އިބްރާހިމް މުޙައްމަދު ޞާލިޙްގެ މި ސަރުކާރުން ކުރައްވާފައިވާ ކަމެއް ނޫން ކަމުގައި ވެސް މަބްރޫކް ވިދާޅުވިއެވެ.

"މިއީ މީގެ ކުރިން ސަރުކާރުތަކުގައިވެސް ކޮށްދީފައި ހުރި ކަމެއް،" މަބްރޫކު ވިދާޅުވިއެވެ.

މީގެއިތުރުން މަބްރޫކް ވިދާޅުވީ ފައިސާ ދެއްކުމުގައި ރިޒޯޓުތަކަށް ލުއި ދެނީ މާލީ ހާލަތު ދަށްވާ ދަނޑިވަޅުގައި ރިޒޯޓުތައް ހުއްޓުނަ ނުދީ ފެންމަތީގައި ބާއްވަން ސަރުކާރުން އެހީވުމުގެ ގޮތުން ކަމަށެވެ. އަދި އެ ރިސޯޓުތައް ހިންގާ ނަމަ ސަރުކާރަށް މުސްތަގުބަލުގައި ވެސް އެ ތަންތަނުން އާންމުދަނީ ލިބޭނެކަން ވެސް އޭނާ ފާހަގަކުރެއްވިއެވެ.