އާއަހަރަށް ކަނޑައެޅި ރިޒޮލިއުޝަން މަތިން ހަނދާން ނެތުނީ؟
ގިނަ މީހުން 2019 ވަނަ އަހަރަށް އަލްވަދާއު ކިޔައި އާއަހަރަށް މަރުހަބާ ކިޔަން ތައްޔާރުވީ އެތައް ފޮނި ހުވަފެންތަކާއި އުއްމީދުތަކާއި އެކުގައެވެ. ދިރިއުޅުމުގައި އިސްލާހުކުރަންހުރި އެތައްކަމެއް އާއަހަރު އިސްލާހްކުރުމަށް ނިޔަތްގަތެވެ. އާއަހަރާއިއެކު އެތައް ބައިވަރު ރިޒޮލިއުޝަންތަކެއް ހާސިލްކުރުމަށް އަޒުމް ކަނޑައެޅިއެވެ. 2019 ވަނަ އަހަރު ކާމިޔާބު ނުކުރެވުނު އެތައް ލަނޑުދަނޑިތަކެއް 2020 ވަނަ އަހަރު ކާމިޔާބު ކުރުމަށް ހިތްވަރު އާލާކުރިއެވެ.
އާއަހަރު ފެށި، އަހަރުގެ ފުރަތަމަ މަސް އަޅުގަނޑުމެންނާއި ވަކިވެ ދަނީއެވެ. އާއަހަރު ފެށި 25 ދުވަސް މާޒީވެ ދިޔައިރު އަޅުގަނޑުމެން މިއަހަރަށް ކަނޑައެޅި ރިޒޮލިއުޝަންތައް ވީ ކޮން ހިސާބެއްގައިތޯއެވެ. ހަޔާތަށް ބަދަލު ގެނައުމަށް އަޒުމް ކަނޑައެޅި މީހުން އެ އަޒުމްތައް މަތިން ހަނދާން އެބަހުރި ހެއްޔެވެ؟
އެހެން އަހަރުތަކެކޭ އެއްފަދައިން މިއަހަރުގެ ވެސް ފުރަތަމަ ދުވަހު މީސްމީޑިއާގެ މައި މަންސަ ކަމަށްވާ ފޭސްބުކްގެ ނިއުސްފީޑް ފުރާލީ އާ އަހަރަށް ކަނޑައެޅި އަޒުމްތަކުންނެވެ. ފަސްވަގުތު ނަމާދު ކުރުމަށް ކަނޑައެޅި މަތިވެރި އަޒުމާއި ބަރުދަން ލުއި ކުރުމާއި ދުންފަތާއި ދުރަށް ދިޔުން ފަދަ ހެޔޮ ބަދަލުތައް ގެންނަން ކުރި އުއްމީދުތަކުންނެވެ. ނަމަވެސް ހައިރާންވާން ޖެހޭ ކަމަކީ އަހަރު ފެށިގެން ދެތިން ދުވަސް ފާއިތުވެ ދާއިރު ކަނޑައެޅި އަޒުމްތައް އެރީ ހަވާއަށް ކަމެއް ނުވަތަ ދެމިގަތީ ބިމު އަޑިއަށް ކަމެއް ނޭނގޭތީއެވެ. އަދި ކަނޑައެޅި އަޒުމްގެ މައްޗަށް ތިމާގެ ހަވާ ނަފުސު ގަދަވެގަނެ، އަޒުމްގެ މައްޗަށް ކުރި ހޯދީތީއެވެ.
އެންމެ ގިނަ ބަޔަކު އާއަހަރަށް ކަނޑައެޅި އެއް އަޒުމަކީ ބަރުދަން ލުއި ކޮށް ފިޓްކޮށް ހުރުމާއި، ދުންފަތުން ދުރަށް ދިޔުމުގެ އަޒުމެވެ. ނަމަވެސް އަހަރު ފެށިގެން ވަރަށް ފޯރީގައި ދުވެ ނުވަތަ ޖިމްއަށް ގޮސް ކަސްރަތުކޮށް އުޅުނު މީހުންގެ އެކަންތައްތައް ދެމިގެންދަނީ ހަފްތާއެއްހާ ދުވަހަށެވެ. ދެން ފެނިގެންދަނީ ދުނިޔެ އޮތްހާ ހިނދަކު ނުނިމޭނެ ''މާދަމާ'' ކިޔާ ތަނެވެ. ހަމައެހެންމެ ދުންފަތާއި ދުރަށް ދާން އަޒުމް ކަނޑައެޅި ގިނަ މީހުން ވެސް، ދުންފަތުގެ ލޮލަށް އެމީހުން އޮބާލުމުގެ ކުރިން ދުންފަތް ކޮށްލި އިޝާރާތަކަށް އެނބުރި ހިނގައްޖެއެވެ.
މިއީ އާ އަހަރު ދިރިއުޅުމަށް ބަދަލު ގެނައުމަށް އަޒުމް ކަނޑައެޅި ގިނަ މީހުންގެ ހާލަތެވެ. އާއަހަރަށް ރިޒޮލިއުޝަން ކަނޑައެޅުން ވެގެންދަނީ ފެޝަނަކަށެވެ. ނުވަތަ ފޫނެއް ފަޔަށް ފެން ފުރުން ފަދަ ކަމަކަށެވެ.
Ads by STO
