ޖިންސީ ގޯނާއާ ދެކޮޅަށް ކުރި މުޒާހަރާގެ ތެރެއިން 4 މީހުން ހައްޔަރަށް
ޖިންސީ ގޯނާއާ ދެކޮޅަށް މިރޭ ރަސްފަންނު ސަރަހައްދުގައި ކުރި މުޒާހަރާގެ ތެރެއިން 4 މީހަކު ހައްޔަރު ކޮށްފިއެވެ.
ފުލުހުންގެ މީޑިއާ އޮފިޝަލް “ދެން”އަށް މައުލޫމާތު ދެއްވަމުން ވިދާޅުވީ މިރޭގެ މުޒާހަރާގެ ތެރެއިން 4 މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށާއި އޭގެ ތެރޭގައި ސޯޝަލް މީޑިއާ އެކްޓިވިސްޓް ޝުމްބާގެ އިތުރުން މުޒާހަރާގެ އިސް ސަފުގައި ހަރަކާތްތެރިވި އެހެން ބައެއް ފަރާތްތައް ހިމެނޭ ކަމަށެވެ.
މުޒާހަރާގެ ބައިވެރިން ވަނީ އަޑުގަދަ ކުރާ ހިފައިގެން އަޑު އުފުލައި ޝުއޫރުފާޅު ކުރަމުން މަޖީދީ މަގުން ހެންވޭރާ ދިމާއަަށް ރަސްފަންނުން ހެންވޭރާ ދިމާއަށް މިސްރާބު ޖަހައިފައެވެ. ނަމަވެސް ފުލުހުން ވަނީ ސަންފްރޮންޓް ފިހާރައާ ހަމައިން މުޒާހަރާގެ ބައިވެރިން ހުއްޓުވާފައެވެ.
މުޒާހަރާގެ ބައިވެރިންނާ ދެކޮޅަށް ފުލުހުން މިރޭ ވަނީ ކަރުނަ ގޭސް ބޭނުން ކޮށްފައެވެ.
